Вознемирувачко видео од девојче тепано од деца во Штип, адвокатка револтирана: „Судот побара само надзор од родител“

Детали

петок, 08 мај 2026

За снимката на која се гледа како девојче е удирано од повеќе деца со тупаници, а потоа е клоцана додека лежи на земја, револтираната адвокатка Маја Ристова вели: „Судот изрече „Засилен надзор од страна на родител” (пресмешно). Изгледа треба да се случи „Рибникар (Србија)”, за да се разбудат, како што се разбудија за семејно насилство по случајот „Ивана и Катја”.

Во последно време сè почесто се случуваат врснички насилства помеѓу млади деца низ Македонија од кои се згрозуваме.

Сега на социјалните мрежи се појави видео за уште едно врсничко насилство, овој пат во Штип, кое е прилично вознемирувачко.

Адвокатката Маја Ристова на својот Фејсбук профил објави снимка на која се гледа како повеќе деца тепаат друго девојче.

На видеото се гледа како девојчето е удирано со тупаници и шлаканици по цело тело, кубена за коса, а потоа дури е и клоцана додека лежи на земја беспомошно.

Адвокатката го споделува видеото револтирана од одлуката на судот и го отвора прашањето до кога нема соодветно да се постапува со вакви случаи – дали треба да чекаме да се случи „Рибникар“?

Во продолжение објавата на адвокатката Маја Ристова (и вознемирувачкото видео):

Ова е врсничко насилство во Штип од пред неколку месеци.

• За кривичното дело “Насилство врз дете” обвинителот предложи воспитна мерка “Засилен надзор од страна на ЦСР”, судот процени дека мерката е строга, па изрече “Засилен надзор од страна на родител” (пресмешно). Предметот е во жалбена постапка.

• За кривично дело “Запуштање и малтретирање на дете” беа отфрлени кривичните пријави, за по жалба да биде вратен предметот на повторно одлучување.

Поентатата ми е како институциите гледаат на овој проблем. Слично како со семејното насилство.

Изгледа треба да се случи “Рибникар (Србија)”, за да се разбудат, како што се разбудија за семејно насилство по случајот “Ивана и Катја”.

М. М. | Црнобело