„Сите мислеа дека сум глупав ми се потсмеваа, се срамев“- градоначалникот на Велес за животот со дислексија

Детали

петок, 12 јуни 2026

Една од најемотивните приказни во најновата епизода на „Нешто Конкретно“ доаѓа од градоначалникот на Велес, Марко Колев кој отворено проговори за животот со дислексија и за предрасудите со кои се соочувал уште од детството.

„Сите мислеа дека сум глупав ми се потсмеваа, се срамев. А вистината е дека никој не знаеше дека имам дислексија. Ни јас не знаев. Тоа го откривме дури кога имав 35 години“, раскажува тој.

Колку сериозно влијаела состојбата врз неговото секојдневие покажува и еден настан од почетокот на неговата градоначалничка кариера.

„Кога станав градоначалник имаше обука за градоначалници. Јас буквално избегав од обуката затоа што требаше да се чита, открива тој. Нас ни бегаат редовите, ни скокаат буквите буквално не можеме да ја прочитаме правата линија од реченицата

И покрај сите пречки, успеал да дипломира на Географија, благодарение на огромната поддршка од неговата мајка.

„Мајка ми ми читаше на глас за да можам да ги подготвам испитите. Така завршив факултет.“

Денес, како градоначалник, говорите му се печатат на жолта хартија за полесно да ги чита, а за својата состојба зборува без страв и без срам.

„Не се срамам од тоа што сум. Сакам луѓето да разберат дека дислексијата не значи дека некој е помалку интелигентен.“

Тој посочува дека многу луѓе со дислексија развиваат исклучителни способности во други области, како визуелна меморија, креативност, логичко размислување и активно слушање.

Во светот, за лица кои живееле или живеат со дислексија често се споменуваат и Алберт Ајнштајн и Том Круз.

Исповедта на градоначалникот отвора важна тема за илјадници деца и возрасни кои секојдневно се соочуваат со истите предизвици, а често наместо разбирање добиваат етикети. Неговата порака е едноставна: дислексијата не е пречка за успехот, туку различен начин на учење и доживување на светот кој заслужува разбирање и поддршка.