Македонска гордост: 15 наши балерини апсолутни победнички на Европско првенство во танц во Москва

Детали

вторник, 10 март 2020

Балетското студио „АРТ БАЛЕТ“ од Скопје изминатиот викенд се закити со 7 златни, 5 сребрени и 1 бронзенa медала на Европското првенство по танц во Москва, Русија организирано од Светската Артистичка Танцова Федерација (WADF).

Петнаесет балерини од „АРТ БАЛЕТ“ на возраст од 8 до 17 години, под раководство на балетскиот педагог Тамара Ѓурчиновска, издвоија голема победа на Европското првенство во Москва и освоија 7 први места (во категориите: jazz ballet small team juniors; contemporary ballet large team mix age; jazz ballet solo adult – во изведба на Бобана Димеска; jazz ballet solo kids - во изведба на Ива Митревска; jazz ballet duo mix age - во изведба на Антонија Атанасова и Сара Димовска; contemporary ballet trio adult - во изведба на Бобана Димеска, Елена Селмановиќ и Сара Димовска; contemporary ballet trio juniors - во изведба на Зорица Тасевска, Хана Патриција Поповски и Нина Димитриоска), 5 втори места (во категориите: contemporary ballet solo kids - во изведба на Антонија Атанасова; acrobatic trio kids - во изведба на Ема Ханџиска, Зорица Тасевска и Марија Димовска; acrobatic small team juniors; contemporary ballet duo kids - во изведба на Елена Тренеска и Ива Митревска), 1 трето место во категорија contemporary ballet adult - во изведба на Сара Димовска и 1 четврто место во категорија open adult - во изведба на Елена Селмановиќ.

На Европското првенство во Москва учество земаа над 22 држави од Европа и други континенти, 104 балетски студија и повеќе од 7000 натпреварувачи кои се натпреваруваа пред публика од над 70.000 љубители на танцот.

Децата учесници беа оценувани од врвни професионалци од областа на танцот од сите танцови стилови, судии од: Русија, Белорусија, Холандија, Германија, Белгија, Италија, Полска, Чешка, Австрија, Филипините, Грција, Хрватска, Србија, Романија, Словенија, Ерменија, Црна Гора, Словенија, Швајцарија, Шведска, Македонија итн.

Балетското студио „АРТ БАЛЕТ“ втора година по ред ја претставува нашата земја на Европското првенство по танц во Москва.

Минатата година „АРТ БАЛЕТ“ издвои голема победа на Европското првенство и се закити со три први места, едно второ место и едно трето место во модерен балет, џез балет и акробатика. Оваа година балерините од ова студио го потврдија минатогодишниот успех и се закитија со двојно повеќе титули.

Напредокот на овие млади таленти е од големо значење за балетското студио „АРТ БАЛЕТ“ кое има за цел да ги едуцира младите кадри да ја сакаат, негуваат и надоградуваат својата љубов кон танцот и културата.

Браво девојчиња!

Извор: Фејсбук