Македонија претставена како врвна дестинација на Lonely Planet со двеминутно видео

Детали

вторник, 04 август 2020

Со двеминутно промотивно видео, Република Северна Македонија е претставена како врвна дестинација за активен туризам во престижниот туристички информатор Lonely Planet.

Видеото, кое беше премиерно објавено оваа недела, е дел од посебна секција наречена “Daydreaming during Covid” – секција во која авторитет во туристичката индустрија ја инспирира својата милионска публика од цел свет да посетат различни дестинации, вклучително и РС Македонија.

Нашата земја во промотивното видео открива активности во недопрена природа, каде луѓето можат да бидат заедно, а сепак на безбедна дистанца, високо во планините или длабоко под водата, искусувајќи го адреналинот и храната, ветрот при едрење или брзината при кајакарење, не изоставајќи ја можноста при тоа да се посетат историските знаменитости, лозови насади, неоткриените села... со една и единствена порака: Најди ја сопствената авантура! #alliNMacedonia.

Видеото е подготвено од Агенцијата за промоција и поддршка на туризмот – АППТ во соработка со Програма за зголемување на пазарната вработливост – ИМЕ, поддржана од Швајцарската агенција за развој и соработка.

Истото претставува сиже од 10-те промотивни видеа кои АППТ и ИМЕ ги подготвија во рамки на кампањата „Дома си е дома“ и каде се претставени 10 туристички дестинации со конкретни активности и производи како дел од активниот туризам (планинарење, велосипедизам, спортско качување, параглајдинг итн.), во комбинација со културни искуства, рурални предели и гастрономија.

Целта на кампањата „Дома си е дома“ е да ги поттикне домашните туристи да поминат активен одмор во домашните дестинации, а до тоа да се придонесе за поддршка на домашните чинители во туризмот (туроператори, сместувачки капацитети, ресторани, превозници итн.) и поддршка на домашната економија, како одговор на кризата предизвикана од Ковид-19.

Видеото можете да го погледнете ТУКА (логирајте се со некоја од понудените опции на линкот за да го видите видеото).

Со ова видео, Република Северна Македонија за првпат се појавува со самостојна објава на престижниот Lonely Planet. До сега, неколку пати сме биле дел од нивни едиторијали и топ-листи заедно со други дестинации од регионот и пошироко. Пред неколку месеци, Северна Македонија се најде и на нивната топ листа на 10 најдобри дестинации за посета во 2020.

Како што пишува Lonely Planet:

“...Република Северна Македонија е реномирана гастро дестинација и со отпочнување на нови авионски рути, нуди бројни причини за да се истражи. Очекувајте “WOW” вредни локации за пешачење низ драматични врвови и недопрени природни чуда.“

Овие активности се дел од заедничките напори на АППТ и програмата ИМЕ за поддршка и промоција на туризмот во РС Македонија и претставување на земјата како врвна дестинација за активен туризам пред домашните и странските гости.

Очекувањата за наредната 2021ва година е активниот туризам да биде во фокусот на домашните и странските туристи, што ултимативно ќе помогне за развој на малите бизниси и креирање на нови работни места, помагајќи и на туристичката индустрија да постигне повисок степен на самоодржливост.