„Јавна соба“ е срамот и бедата на едно урнисано општество каде што мажот уште тропа со раката на масата и мисли дека е семоќен

Детали

сабота, 30 јануари 2021

По изјавата на храбрата Ана од Кавадарци за нејзината слика и невкусниот коментар прикачен на истата во виртуелната збирштина наречена „Јавна соба“, група во која многу веројатно членуваат манијаци, педофили, сексуално импотентни, потенцијални силувачи и којзнае уште какви настрани ликови, еве што имаме да резимираме:

Ана е жртва! Кој ви го дава правото, о вие безгрешни, да кажувате како требало или не требало да се слика и каква слика да објави на нејзиниот личен профил на друштвена мрежа? Сликата била „оправдано злоупотребена“, Ана не ги прочитала условите за приватност и споделување на Инстаграм? А телефонскиот број и местото на живеење? И тие се „оправдано споделени“?

Членовите во оваа група се предатори. Опасни, манијакални демначи кои се кријат зад псевдоними и лажни имиња додека споделуваат (неретко) и слики од малолетни девојчиња и болни фантазии поврзани со нив. Ова се нечии сопрузи, синови, браќа и татковци. Иако е практично невозможно, за жал, го молам денот кога, на пример, би се објавиле нивните вистински идентитети. Да видиме кои се тие храбри момци кои се кријат зад тастатурите и коментираат колку некоја 15-годишна девојка „е зрело градена“ за нејзината возраст.

Освен што треба да се засрамат болните умови односно членовите на оваа група, жените кои ѝ се „настрвени“ на Ана и жртвите како неа ми се особено интересен феномен. Практично, како „одвај да чекале и пекале“ да се случи вакво нешто, па веднаш со копјата и факелите да тргнат во истребувачки поход на „блудните и неморалните“ во општеството.

Уште еднаш, синдромот на „безгрешните“ е неприкосновен во оваа мала Македонија. Најголемите „домаќинки, прибрани жени, тивките, скромните, чесните, невините“ се тука да поделат ум и лекција за тоа како треба некој да се однесува.

Сериозно, гледајте си го дворот. И себеси и своите деца, а бога ми и сопрузите. Да не испадне не дај Боже утре вашето дете да е дел од „неморалот“ во општеството или вашиот сопруг да е член на некоја ваква „секта“.

Секоја чест за храброста на Ана. Сè додека за ваквите работи се молчи и се туркаат под тепихот, сè дотогаш ќе постојат, ќе има уплашени жени и гласноговорни, агресивни мажи кои тропаат со раката по масата и сметаат дека се семоќни, на ниво на богови.

Не сте богови. Вие сте подли, злобни, исфрустрирани суштества од кои се прелева макроагресија и микро… мозоци. За жалење сте.

Налетав на некаков слоган „Заштити ја ќерка ти“ па пречкртано и додадено „Едуцирај го син ти“. Искрено, едуцирајте си ги децата без оглед на полот. Научете ги да ги почитуваат сите луѓе, а обрнете посебно внимание на односот кон жените, дури и ако имате ќерки. Не растете мали, шовинистички суштества, женомразачи кои мислат дека жената е „ороспија“, слугинка во домот, безгласна буква, празноглава кукла …

Дека е добра само за секс и раѓање деца и готвење во кујна и перење и пеглање. Ако сериозно им ги всадувате овие мисли на вашите синови и ќерки, вие сте лоши родители кои не успеале да си го воспитаат децата. И вие сте дел од бедното, урнисано општество кое од ден во ден сè повеќе тоне и пропаѓа.

Содржината и ставовите изразени во авторските текстови и колумни претставуваат лични ставови на авторот и не се ставови на целата редакција на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

(О)Милена | Црнобело