„Едвај чекам да седнам со тебе пак“ – Емотивна објава на синот на Горан Стефановски - бронзената скулптура го виде небото над Дебар Маало

Детали

четврток, 19 август 2021

„Добредојде дома стари! Едвај чекам да седнам до тебе пак... Бронзениот Горан конечно го виде небото над Дебар Маало - ве чека на седенка и муабет“ – напиша синот на Горан Стефановски, откако скулптурата на македонскиот драмски писател, кој почина во 2018-та, пристигна во Скопје. 

Големиот македонски драмски писател, академик и универзитетски професор, Горан Стефановски почина во 2018-та година и остави зад себе огромно културно наследство.

Тој е автор на некои од најпознатите македонски драми, меѓу кои: „Диво месо“, „Јане Задрогаз“, „Дупло Дно“, „Тетовирани души“ и многу други...

По три години од неговата смрт и 10 месеци откако беше најавено дека скулптурата на Горан Стефановски е готова, таа конечно го доби своето место во скопско Дебар Маало.

Неговиот син Игор Стефановски по тој повод напиша емотивна објава до фотографијата од „бронзениот Горан“:

Конечно, после една година изработка, долги ковид-месеци во склад, и неколку недели во кутија, сабајлево бронзениот Горан го виде небото над Дебар Маало!

За жал, поради новите мерки, нема да има јавен настан за отворањето. Но, сигурно така и требало да биде, бидејќи Горан секогаш се враќаше во Скопје тивко и ненајавено - едноставно си сакаше да се појави (всушност, никогаш не се сметаше за отсутен).

Така што, еве и овој пат, во текот на денот (здравје), Горан би требало да биде поставен на своето место, каде ќе ве чека за седенка и муабет. Кога ќе бидете во можност, отидете да го поздравите.

ДОБРЕДОЈДЕ ДОМА СТАРИ! Едвај чекам да седнам до тебе пак...

 Б. С. Б. | Црнобело