Нашата водителка Нина, со искрена фотка: „За лице со акни, најголем предизвик е да излезеш без шминка“

Детали

понеделник, 13 декември 2021

„За лице со постојано појавување на акни, најголем предизвик е да излезеш на улица без шминка. Не зборувам за тоа кој и како ќе ме гледа, туку да се обидам да излезам од својот кафез. Изминатата недела собрав храброст..“, раскажува Нина Ред.

Во последно време повеќе Македонки на своите Инстаграм профили отворено проговорија за проблемите со акните на лицето, па по Зои Блаж, Ана Стојанова, сега и македонската водителка, танчарка и инфлуенсерка Нина Ред, односно Николина Славковска, го покажа лицето во природно издание.

Таа вели дека по 9 години за првпат собрала храброст отворено да говори на темата и да излезе и да се прошета без да ги крие акните.

Порачува дека чувството е прекрасно и ги охрабрува и другите девојки да го сторат истото, како и да се грижат за својата кожа.

Нејзината објава гласи:

„Сите ние колективно треба да сме понежни во меѓусебната комуникација едни со други, а кон самите себеси далеку најнежни. Сфативме дека мислите умеат да го преземат воланот, но не и да ја одредат локацијата каде целиме да стигнеме.

Низ сите овие фази во кои што поминав со лицето моментално кожава го живее најдобриот период од својот живот. За лице со постојано појавување на акни, најголем предизвик е да излезеш на улица без шминка.

Не зборувам за тоа кој и како ќе ме гледа, туку да се обидам да излезам од својот кафез.

Изминатата недела собрав храброст и за прв пат бев на јавен настан, поточно на плоштад Македонија за денот на италијанската храна, меѓу голема толпа луѓе и во другиот агол јас и моето природно лице.

Замислете, си го победив стравот после цели 9 години. Немало поубаво чувство. Пеев, играв, се смеев, објавував сториња. Среќа!

Сега знам дека луѓето низ моето лице и очи ја гледаат само душата моја, а не состојбата на лицето. Сè си има свој процес на лекување и треба да се има трпение. Затоа со ова сакам да ја поттикнам секоја една девојка, па и момците (знам дека ве има) да почнете да се грижите за својата кожа, хранете се здраво, направете ги сите редовни контроли, алерго тестови, хормони, читајте книги, направете гинеколошки преглед, медитирајте, обратете се до своите дерматолози, луѓе кои навистина темелно ја разбираат оваа проблематика (која е се почеста кај помладите), бидејќи и ова драги мои е длабока љубов кон себеси.

С. С. | Црнобело