Скандал на Евровизија – МРТ размислува да ја повлече нашата претставничка, откако го фрли македонското знаме (видео)

Детали

недела, 08 мај 2022

По скандалозниот потег на Андреа, која го фрли македонското знаме на тиркизниот тепих на Евровизија со намера да позира без него, се огласија и од МРТ: „Јавниот сервис на ниту еден начин не стои зад ваквото скандалозно однесување на нашата евровизиска претставничка, која со тој гест покажа непочитување кон националното обележје, што е казниво со закон“.

Вечерва (08.05.2022) се одржа официјалната церемонија за отворање на Евровизија, а на тиркизниот тепих прошетаа делегации од сите земји претставнички.

Кратко по појавувањето, нашата претставничка Андреа Коевска, која позираше со македонското знаме во рака, одеднаш го фрли знамето и продолжи да позира со празни раце, па се упати кон водителите за кратко интервју.

Нејзиниот потег наиде на голема осуда од македонската јавност, а сега и јавниот сервис соопшти дека го осудува скандалозното однесување на нашата евровизиска претставничка, па дури и дека се разгледува опцијата за нејзино повлекување од Евровизија.

Погледнете го видеото (македонската делегација се појавува на 55-та минута)

Во официјалното соопштение на МРТ стои:

Јавниот сервис на ниту еден начин не стои зад ваквото скандалозно однесување на нашата евровизиска претставничка, која со тој гест покажа непочитување кон националното обележје, што е казниво со закон...

Македонската Радио Телевизија најостро го осудува потегот на нашата претставничка на „Песна за Евровизија 2022“, Андреа Коевска којашто за време на фотографирањето во Торино го фрли на земја државното знаме.

Јавниот сервис на ниту еден начин не стои зад ваквото скандалозно однесување на нашата евровизиска претставничка, која со тој гест покажа непочитување кон националното обележје, што е казниво со закон.

МРТ очекува од Андреа да им се извини на граѓаните за ваквото однесување. Јавниот сервис  ја разгледува можноста за нејзино повлекување од Евровизија, иако ќе се води сметка да не се предизвика поголема штета по МРТ.

Против одговорните во македонската делегација ќе бидат преземени сите законски можности за најстрого санкционирање за овој скандал.