„Снага карпа, душа како памук“ - колегите се простуваат од актерот Митко С. Апостоловски кој почина на 67-годишна возраст

Детали

петок, 05 август 2022

Ќе го помниме по култната реплика во филмот „Трето полувреме“ каде ја толкуваше улогата на Димитрија. Познатите личности масовно го споделуваат видеото во кое тој вели: „Македонија е свето име“,  по веста за смртта на актерот Митко С. Апостоловски.

Веста за смртта на актерот Митко с. Апостоловски ја објави Битолскиот народен театар:

„Денеска не напушти доајенот на македонското глумиште, долгогодишниот член на Народен Театар Битола, актерот со единствен стас и глас Митко С. Апостоловски.  Неговата исклучителна харизма со која пленеше од сцената уште долго ќе ја паметиме. Нека ти е светол патот почитуван колега!“ – стои во објавата на Фејсбук.

По објавата голем број од познатите личности со свои објави се простуваат од актерот кој покрај големиот број театарски услоги, ќе остане запаметен и по филмските улоги, во филмовите „Големата вода“, „Година на мајмунот“, „Јас сум од Титов Велес“, „До балчак“ и други.

Познатите македонски личности се збогуваат со познатиот актер, а голем дел од нив го споделуваат и видеото со култната реплика од филмот „Трето полувреме“:

„Почина Митко С. Апостоловски. Актерот кој на филмското платно ќе биде запомнет по репликата “Македонија, тоа е свето име бе мамето ваше”.

Битолчанец кој долги години работеше во театарот во Куманово и зборуваше перфектен кумановски.

Почивај во мир Мице. Нека ти е светол патот.

Ќе се видимо тамо негде на некоју раќију. .“ – напиша актерот Тони Михајловски.

„Снагата карпа, душата памук, очите и насмевка космос, актерски виртуоз, доајен на битолското и македонско глумиште. почивај во мир драг Митко С. Апостоловски, нека ти е вечно името и славата“ - напиша актерката Јелена Жугиќ.

„Македонската и балканската театарска и филмска сцена денес изгубија многу. Битолскиот театар остана без еден од своите доајени. Но, секогаш ќе те паметиме вака, како што беше Великан на театарските штици и филмското платно“ – напиша Неда Маретиќ.

 Б. С. Б. | Црнобело