Ребека со моќен говор: „Ова признание е на сите мајки на дечиња со посебни потреби, за сите борци“

Детали

среда, 14 декември 2022

„Ви благодарам многу, ви благодарам на сите, навистина се изненадив дека ме номинирале на овој избор и дека сум добила признание. За првпат во Македонија добивам признание за тоа што го работам веќе долги години...“, го започна својот емотивен и моќен говор Ребека, која ја доби наградата „Жена со посебен придонес во општеството“.

Денес (14.12) се одржа изборот „Жена на годината“ во Музејот на македонската борба, чија цел е  да се оддаде признание на дамите кои со својот професионален и општествен ангажман секојдневно и во континуитет поставуваат високи стандарди на деловно и етичко однесување и остваруваат забележителни резултати во годината што одминува.

Меѓу наградените беше и Ребека Јанковска Ристески нашиот најгласен гласноговорник за правата на децата со попреченост. Таа ја зема наградата „Жена со посебен придонес во општеството“.

Нejзиното обраќање гласи:

„Ви благодарам многу, ви благодарам на сите, навистина се изненадив дека ме номинирале на овој избор и дека сум добила признание. За првпат во Македонија добивам признание за тоа што го работам веќе долги години.

Знаете ова признание е признание за сите борци со кои јас секојдневно комуницирам. Тоа се не само жени, туку и татковци, иако претежно се мајки, кои секојдневно се соочуваат со многу предизвици.

Борбата не е само нивна лична, борбата е на целото семејство, борбата е со општеството, борбата е во средините каде што живеат, на секој чекор. Која врата и да ја отворат наидуваат на пречка.

Моето влијание во општеството е од многу зборување, постојано нели зборувам за лицата со попреченост, постојано правам нешто за нив, многу проекти има навистина за да почнам да ви ги раскажувам што сè и со други здруженија и со Националната алијанса за ретки болести, каде што сум претседател, каде што се 20-тина и повеќе здруженија, со Ресурсниот центар на родители со деца со посебни потреби, таму имаме затворена група на Фејсбук каде што сме 3.000 членови, родители на вакви дечиња, и постојано правиме многу работи и се бориме и протестираме и постојано се прашуваме зошто многу од луѓето кои нè слушаат не сакаат да не разберат и само нè тапкаат по рамо.

Секогаш излегувам, зборувам гласно, давам интервјуа, излегувам на протести, меѓутоа верувајте дека очајот меѓу децата и родителите на деца со попреченост е огромен, а најголемиот проблем е во реализацијата на проектите.

Некои од овие деца не можат да бидат гласни, некои од нив не зборуваат, некои не можат да гледаат...

Ова признание е признание на сите мајки. Тука се дел од нив. Има многу мајки и луѓе кои се борат и им благодарам неизмерно.

Би сакала ова признание да биде признание за целото наше општество, да биде признание со кое ние ќе се гордееме и работите да тргнат на подобро.“

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело