3 трилери од македонски автори (заради кои ќе грицкате нокти до самиот крај)

Ви претставуваме три возбудливи трилери од македонски автори за кои се зборува, и кои треба да ги прочитате.

И кај нас има солидни автори на трилери што знаат да ве вовлечат во приказната и да ве држат во неизвесност до последната страница.

Ви препорачуваме 3 вакви романи, што вреди да ги прочитате.

Ќе бидете изненадени од талентот што го поседуваат нашите млади писатели, моќта преку зборови да ви отсликаат една реална приказна и да ги доловат емоциите и напнатоста, кои се карактеристични за некои од најпознатите писатели во светот.

Во продолжение 3 трилери од македонски автори:

„Девојката што ја наслика смртта“ – Андреа Мирческа

Ова е првенче на авторката Андреа Мирческа, а станува збор за психолошки трилер со примеси на романса, мистерија и драма.

Роман којшто може да се стави на исто рамниште со најпознатите светски трилери, а описите на карактерите и на настаните се прецизни, точни и дефинирани.

Приказната ја следи 19-годишната Јулија која го напушта родниот Охрид и заминува на студии на Академијата за уметности во Загреб и таму го запознава студентот по архитектура Адам.

Но, тие двајца и другите ликови ќе се соочат со голем број предизвици: предавства, сексуално малтретирање, убиства, нарушено ментално здравје...

„Опасна игра“ – Мери Арсова

Овој роман на Мери Арсова ја следи приказната на Давид, обично момче кое има работа што ја мрази и свршеница во која се сомнева дека e вљубен.

Но, еден обичен мартовски ден, ќе му донесе изненадување, кога ќе се сретне со својата средношколска љубов Ева, која со години наназад е преселена во Америка и е омажена за богат бизнисмен.

Навидум обичната и случајна средба се развива во многу опасна, промислена игра.

Станува збор за крими трилер кој ќе ве држи напнати од самиот почеток, па сѐ до крајот.

„Сенки во подземјето“ – Марија Ралповска

Марија Ралповска е млада македонска авторка која почнала да пишува на 14 години, а дипломирала криминалистика на Факултетот за безбедност во Скопје.

Сосема очекувано е нејзиниот трилер да биде инспириран од светот на криминалот.

Во овој роман се преплетуваат три приказни на тројца сосема различни луѓе: банкарот, криминалецот и јавниот обвинител, кои навидум немаат ништо заедничко, освен жената по која трагаат.

Не се знае кој е пленот, а кој жртвата.

Дали тоа се споменатите ликови или, пак, жената по која трагаат?

Б. С. Б. | Црнобело