Александра од Скопје обожава книги од македонски автори, во библиотеката има 600 дела - Кои 5 ѝ се омилени?

„Славејот“, Кристин Хана

„Славејот“  е приказната за сестрите Вијан и Изабел кои за време на Втората светска војна живеат во Франција, каде секоја на свој начин се бори за преживување и слобода.

Додека едната тивко се обидува да го заштити семејството, другата станува дел од отпорот и ризикува сè за да спасува животи.

Со нетрпение го очекувам филмот кој ќе излезе во месец февруари 2027 година, а посебно сум возбудена бидејќи двете сестри, Вијан и Изабел, ќе ги глумат актерките Дакота Фенинг и Ел Фенинг кои се во вистински живот сестри и првпат ќе глумат во некој филм заедно.

„Четврто крило“, Ребека Јарос

Ова е првата книга која ме внесе во жанрот  романса-фантазија. Првиот дел од серијалот на Ребека Јарос кој не само во светот, и во Македонија направи вистински бум од возбуда.

Додека ја читав, имав чувство како и јас да јавам на змеј - срцето ми чукаше брзо, а секоја страница беше нов лет низ хаос и возбуда.

Станува збор за девојка по име Вајолет Соренгејл, која сѐ што сака е да работи во библиотека но наместо мирен живот таа е принудена да влезе во сурова академија каде идните јавачи на змејови се борат за опстанок.

Додека се обидува да преживее меѓу опасни тестови, тајни и политички игри, таа влегува и во комплициран однос со мистериозниот Зејдан.

Моментално се снима серијата која ќе биде адаптирана по овој серијал, а „битката” за тоа кој треба да го глуми згодниот Зејден Риорсон е навистина жестока, посебно од страна на женскиот пол.

„Куќа од стакло“, Сара Пеканен

Трилер што ме натера да се сомневам во секој лик. За мене брзото дејство, напнатоста и постојаните тајни се клучни за еден добар трилер.

Оваа книга ми е посебно драга бидејќи ми ја потпиша самата авторка Пеканен, која ја запознав овогодинешниот Саемот на книга и ми одговори лично на неколку прашања поврзани со неа.

Уште еднаш се докажа дека големите авторски имиња се толку срдечни, љубезни и отворени за комуникација.

Темата што ме интересираше секако е дали ќе има за набрзо најава да се адаптира некоја нејзина книга во филм или ТВ-серија.

„Неверојатно бистри суштества“, Шелби Ван Пелт

Ова е книга која ќе ти го стопли срцето и ќе ти ја погали душата. Толку длабоко навлегуваш во приказната што почнуваш да веруваш дека сè е можно, па дури и дека октоподите зборуваат.

Се зборува за жена која е во години, по име Тови, која работи во аквариум и неочекувано создава посебна врска со Марселус, неверојатно интелигентниот октопод.

Преку нивното необично пријателство, полека се откриваат тајни од минатото и приказна за загуба, надеж и втори шанси.

Само што излезе филмот на платформата Нетфликс и ќе кажам дека иако имаше неколку поголеми разлики од книгата, мене лично не ми пречеше.

Многу уживав и во книгата, но и во филмот.

„Високо во облаците“, Лиз Томфорд

Ова е книга која е дел од серијалот Windy City. Станува збор за спортска романса за  стјуардесата Стиви и хокеарската ѕвезда Еван Зандерс.

Зад славата, сарказмот и хемијата, и двајцата се соочуваат и со лични несигурности, трауми и страв.

Романса што ми се допадна многу бидејќи не станува збор за уште една клише приказна.

Женскиот лик не е типична „совршена“ девојка туку реална, со облини, став и карактер.

Токму тоа ја прави приказната поавтентична.

Само пред неколку дена официјално се објави веста дека и овој серијал ќе биде адаптиран во ТВ-серија, што ми е посебно драго.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело