„Одбројување“, „Земјотрес“, „Апокалиса“ - 3 книги кандидати за Роман на годината

Во изборот за „Роман на годината 2017“ учествуваат 28 наслови, а денес ви претставуваме 3 кои исклучително го заслужуваат вашето внимание.

Има некоја посебна убавина да се читаат книги оригинално напишани на мајчиниот јазик, а доколку сте од оние кои не преферираат македонски автори, време е да им дадете реална шанса.

Бидејќи навистина имаат што да понудат. Нека на вашиот следен список за читање се најдат:

Апокалипса.мк - Прља Бранко

Последната книга на Бранко Прља влегува во изборот за Роман на годината, по успехот кој го имаа претходниците „3 минути и 53 секунди“ и „1 час и 30 минути“.

Апокалипса.мк е роман за една дистопија или приказна за една реалност? Ви останува вам да откриете колку случки, настани и ликови ќе ги препознаете како дел од вашето секојдневие, што воедно ќе ве натера да анализирате дали станува збор за фикција или огледалото на една реалност?

Земјотрес, 5:17 - Владимир Плавевски

Романот на Плавевски е тематски врзан со земјотресот на 26 јули 1963 во Скопје.

Авторот сликовито ја опишува катастрофата и ужасот предизвикан од природната непогода.

Иако станува збор за фиктивна приказна, таа сепак се потпира на многу веродостојни факти. Авторот како личен сведок на многу од настаните преточени во уметничка проза ја прават оваа приказна за деновите пред и по земјотресот сосема уверлива.

Одбројување - Фросина Пармаковска

Со наратив типичен за оваа македонска авторка, Пармаковска го крева превезот зад животот на една млада жена заробена во брак со ментално нестабилен сопруг.

Низ нарацијата на главниот лик, полека ги откриваме нејзините најинтимни чувства, стравови, но и мали победи. Што ќе се случи до крајот? Ќе успее ли младата жена да се ослободи од светот исполнет со безумност и лудило?

(О)Милена | Црнобело