3 задолжителни „лектири“ за патувачи

Не заминувам на патување без книга. Тоа ми е непишано правило кое веќе со години го следам. Колку и да сум натоварен, секогаш наоѓам простор за книга, макар еден наслов, кој знам дека верно ќе ме придружува. 

Во моментите кога имам потреба од лична изолација, гледам да се сместам во некој парк и да се пренесам во тој книжевен свет, истовремено, отцепувајќи се од реалноста.

На тој начин, без разлика какви и да се патувачките исходи, возбудата што се случува двојно ме исполнува.

А самата помисла дека не сум сам, дека покрај мене се наоѓаат фиктивни ликови е факт што ме воодушевува.

За следното патување одберете некој од овие наслови:

Патувањето на еден слон – Жозе Сарамаго

Ова е волшебна приказна која се случува во 1551 година кога португалскиот крал Жоао III на австрискиот надвојвода Максимилијан решава да му прати невообичаен свадбен подарок: слонот Соломон.

Не би навлегувал премногу во детали, но ќе кажам дека Патувањето на еден слон е сказна каде што се испреплетува иронија и емпатија, проникната е со духовни размисли за човековата природа и ја засведочува трајноста на пријателството.

На пат – Џек Керуак

Не можам да ја продолжам листата ако не го наведам насловот што одново и одново го исчитувам. На пат за мене претставува животна лектира, а истовремено е и вистинско ремек-дело на авторот.

Овој автобиографски роман е едно сликовито претставување на џезерска Америка од педесеттите години на минатиот век и лирско сведоштво за разголениот живот на бит-генерацијата.

Можеби многумина од вас го имаат прочитано, но секогаш е пријатно да се проталка заедно со јунакот Нил Кесиди, патник и мистик, жива инкарнација на едно подзаборавено време.

Островот на претходниот ден – Умберто Еко

Да се разбереме, ова не е лесно четиво, но тематиката на романот ќе ви овозможува двојно патување со самата помисла кога емпатично ќе се поставите спрема главникот лик Роберто, кој преживува бродолом и останува заровен во морска шир.

Преку неговите дневнички записи ја следиме приказната за време на неговиот престој на пуст брод, кој раскажува за своето детство, страстите, за злобниот брат, опсадите и смртна на неговиот татко...

Еко преку книжевниот стил, богатата игра со јазикот и  со искрени емоции ја потврдува својата величина како еден од најдобрите постмодерни писатели.

Автор: Евгениј Хоуп | Црнобело