3 одлични „причини“ зошто да (си) подарите книга од македонски автор за празниците

Се нервирате со лоши преводи, ужасна лектура на книги од странски автори? Тој проблем е апсолутно надминат со книги од домашни автори. 

Доколку мислите дека немаме квалитетна современа литература, време е да свртите нови страници.

Воедно, доколку сте во потрага по одличен подарок за блиските, или пак сакате да се почестите себеси за новогодишните празници, книгата е совршено решение. 

Препорачуваме три одлични книги од македонски автори, за себе или за подарок:

Во главата слушам песна – Елизабета Баковска

„Кратки раскази, внимателно структурирани, уметнички ефективни и емотивно топли“. Баковска е вистински мајстор, суптилно издвојува значајни и навидум безначајни животни фрагменти во кои апсолутно ќе се препознае секој од нас.

Цел еден универзум распослан на страничка или две. Ќе си ги препрoчитате неколкупати и ќе размислувате одново и одново за нив.

Нечесна игра – Верица Митева

Викторија и Филип работат како дизајнери во конкурентски фирми за изработка на мебел. Во истата недела двајцата добиваат наредба од нивните шефови „да се зближат“ со конкурентскиот дизајнер и да ги украдат скиците за претстојниот саем за мебел, бидејќи тоа е најважниот настан и период за сите фирми за мебел во државата.

Немајќи друг избор, тие неволно се согласуваат затоа што не сакаат да ја изгубат работата. Така започнуваат да се гледаат и двајцата размислуваат за начини како да го спроведат планот и да дојдат до целта. Но, помеѓу нив почнува да се раѓа нешто сосема друго…

Шардоне и шпагети карбонара – Марта Димитров

„Шардоне и шпагети карбонара“ е навидум љубовен роман, во кој се вплеткуваат приказните за Миа и Милан како пријатели и за Ксенија, како девојка на Милан.

Освен случувањата околу овие две релации – пријателската меѓу Милан и Миа, и љубовната меѓу Ксенија и Милан, низ романот се отсликува и хобито на главната хероина како млада писателка.

Вагајќи низа свои постапки, ликовите констатираат дека зрелоста нема врска со годините, туку со себенадминувањето во обидот да се спречат егото и ароганцијата.

(О)Милена | Црнобело