Починала сосема сама на 98 години – Фановите се простуваат од легендарната „Супер бабичка“

Детали

среда, 15 мај 2024

„Таа беше млада и на 98 години и беше силна во 80-тите затоа што јадеше каша. Ти благодариме за спомените“ – стои во еден од коментарите на Твитер, откако беше соопштена веста за смртта на актерката Гудрун Уре, која ја толкуваше улогата на „Супер бабичка“.

На возраст од 98 години, вчера (14.05) почина актерката Гудрун Уре, која беше најпозната по тоа што ја толкуваше улогата на „Супер бабичка“ во истоимената детска серија од 80-тите години.

Веста за смртта ја соопшти нејзината внука Кејт Мекнил.

За британските медиуми таа потврди дека последен пат ја видела својата баба во декември, а дека тогаш Гудрун била пресреќна затоа што се најавувало повторно снимање на популарното шоу.

Како што рече, Гудрун била горда секојпат кога ќе ја препознаеле по славната улога.

Гудрун беше шкотска актерка, родена во 1926-та, која имаше 40-годишна актерка кариера.

Речиси целиот свој живот го поминала во Лондон, каде била вработена во Театарот за деца и младинци. Освен тоа, играла во повеќе театарски претстави и филмови.

Сепак, најпозната е по улогата на бабичката со супермоќи, а серијата „Супер бабичка“ ја доби интернационалната награда Еми во категоријата филмови за деца и млади во 1985-та година.

Серијата „Супер бабичка“ се емитувала во над 60 земји.

Гудрун повеќе од 40 години беше во брак со сопругот Џон Ремзи и живееше заедно со него и посвоениот син Гордон.

Таа починала сама во својот дом во Лондон.

Веста за нејзината смрт брзо се прошири на социјалните мрежи, каде твитерџиите масовно се простуваат од жената, која ги навраќа на некои од најубавите спомени од детството.

Во продолжение дел од твитовите:

„Таа беше млада и на 98 години и беше силна во 80-тите затоа што јадеше каша. Ти благодариме за спомените“

„Таа имаше огромна улога во моето гледање телевизија како дете. Успеа да доживее супер возраст од 98 години“

„Актерката што сакав да ја гледам како дете почина на 98 години. На фотографијата сум во градинка маскирана како Супер бабичка“

„Почивај во мир Гудрун Уре“

Б. С. Б. | Црнобело