Полусестрата на Кејт Мос се предозирала со Оземпик, лекот што се користи за слабеење: „Имав 53 kg, завршив во болница“

Детали

петок, 13 септември 2024

„Користев доза за луѓе кои имаат 100 килограми, а јас имав 57. За неколку недели стигнав до 53 килограми, бев дехидрирана и завршив во болница“, раскажува Лоти Мос за искуството со лекот Оземпик, кој многу познати го користат за слабеење.

Полусестрата на Кејт Мос – Лоти – откри дека завршила во болница откако се предозирала со Оземпик, лекот за дијабетичари што бројни славни личности го користат за слабеење.

26-годишната Лоти е модел и никогаш немала проблем со вишокот килограми, но почнала да го користи лекот бидејќи не била задоволна од изгледот.

Во 1990-тите, сестра ѝ Кејт го прослави екстремно слабиот изглед, а имаше изјавено и дека „никоја храна не е толку вкусна колку чувството да си слаб“.

Па, веројатно не изненадува што и Лоти сакала да изгледа екстремно слабо.

Лоти е висока околу 170 сантиметри, а кога почнала да го користи лекот имала околу 57 килограми.

Лекот го добила од пријателка, која, пак, нелегално го набавила од лекар, а сега вели дека никогаш повторно нема да се осмели да го користи.

Лоти се предозирала – за помалку од месец тежината ѝ се спуштила на 53 килограми, била сериозно дехидрирана и завршила во болница.

„Пред неколку месеци, не бев задоволна од мојата тежина, па една пријателка ми набави Оземпик од лекар.

Но, лекарот не ми провери крвен притисок и не ми направи други тестови, како што треба пред да ви дадат лек како Оземпик.

Сепак, ова е лек и може да биде опасен“, раскажува Лоти во поткаст.

„Дозата што ја користев јас беше за лица кои имаат 100 килограми, а јас имав 50-тина. Но сепак, си го инјектирав во ногата и тоа беше најлошата одлука што сум ја донела.

Го користев две недели... Никогаш не сум се чувствувала полошо. Повраќав. Почнав со помала доза, а потоа ја зголемив.

Два дена не можев да станам во кревет, се чувствував ужасно, нагло ослабев.

По првата доза имав 57 килограми, а потоа тежината ми се спушти до 54 килограми.

Стигнав до 53 килограми за многу краток период, а тоа не е здраво слабеење“.

Лоти вели дека иако сакала да престане со лекот, тој веќе бил во нејзиниот систем и не можела туку-така да се ослободи од неговото влијание.

„Еден ден ми беше толку лошо, што ѝ реков на пријателка дека морам во болница“.

Кога отишла во болница, Лоти била сериозно дехидрирана и изгубила свест.

„Отидов во болница во три наутро и една медицинска сестра ме праша колкава доза користам. Јас ѝ кажав и ми рече дека дозата е превисока за мене.

Ме испрати во одделот за итни случаи во инвалидска количка. Ме прегледа друга медицинска сестра, па добив напад бидејќи бев дехидрирана и, искрено, ова е најстрашното нешто што сум го доживеала.

Не знаев што се случува – целото тело ми се грчеше, не можев да ги движам дланките. Беше ужасно“.

Лоти претходно има зборувано за притисокот да биде екстремно слаба што ѝ бил наметнат од модната индустрија.

Таа стана модел на 16-годишна возраст, а вели дека се чувствува како да живее во сенка на сестра ѝ Кејт.

На почетокот на кариерата, имала навика да јаде на паузите од фотосесиите, а тогаш ѝ рекле дека нема да стапне на модна писта ако продолжи да јаде и не ослаби.

По сите критики за нејзиното тело, вели дека е среќна што не развила нарушување во исхраната.

Но, развила депресија, па почнала да користи многу кокаин и алкохол за да се справи со симптомите.

Во 2022 година отиде на рехабилитација и вели дека денес е ослободена од пороците.

Спирова С. | Црнобело