Ги крие децата од јавноста, до 16 години нема да им даде телефон – Каква мајка е Пенелопе Круз?

Детали

вторник, 21 декември 2021

За разлика од голем број познати личности чиишто деца од најмала возраст се во фокусот на јавноста и имаат сопствени профили на социјалните мрежи, Пенелопе Круз и Хавиер Бардем се мошне строги и на сопствените деца (8 и 10) не им дозволуваат воопшто да имаат телефони.

Хавиер Бардем (52) и Пенелопе Круз (47) се во брак од 2010-тата година, а заедно имаат две деца, синот Лео (10) и ќерката Лена (8).

Тие ретко говорат за сопствените деца во јавноста, ги кријат од медиумите, но затоа често говорат за тоа дека се мошне посветени родители и се обидуваат во целост да ги заштитат сопствените деца.

Во продолжение проследете неколку интересни изјави што говорат за тоа какви родители се Пенелопе и Хавиер:

Забрана за социјални мрежи и мобилни телефони

Актерката во гостување во CBS Sunday Morning говореше за тоа како се обидува да ги заштити децата од социјалните мрежи и интернетот.

„Имам чуден однос со социјалните мрежи и ги користам мошне внимателно. Има нешто што не ми е логично кај нив и сметам дека особено се погодени помладите генерации.

Се чувствувам лошо особено за оние што се тинејџери во овој период. Наликува како светот да извршува некој вид на експеримент врз нив. ‘Ајде да видиме што ќе се случи ако изложите 12-годишно дете на толку многу технологија’“ – вели Пенелопе.

Според неа нема никаква заштита за 12-годишните деца што се вклучуваат на социјалните мрежи.

„Нема никаква заштита за нив, за нивните мозоци што сѐ уште се развиваат, за начинот на којшто се гледаат себеси и се изложени на малтретирање (булинг). Тоа воопшто не наликува на нашето детство“ – вели Пенелопе.

Таа додаде дека е мошне строг родител и дека понекогаш им дозволува на децата да гледаат филмови или цртани филмови, но постои едно правило од кое не планира да отстапи:

„Нема да им дозволам да имаат мобилни телефони сѐ додека не се повозрасни, а нема да имаат пристап ниту до социјални мрежи додека не наполнат 16 години.

Според мене, на тој начин го штитам нивното ментално здравје, но изгледа дека сум малцинство. Не знам“ – вели таа.

Пенелопе посакувала да биде мајка од дете

Пенелопе во минатото говореше за мајчинството па откри дека уште од најмала возраст посакувала да биде мајка.

„Сакав да бидам мајка уште кога бев мало девојче. Секогаш од Дедо Мраз барав кукли бебиња и секогаш си играв мајка.

Но, неверојатно е тоа што се случува кога ќе го видиш сопственото дете за првпат, знаеш дека во целиот остаток од животот ќе го гледаш светот поинаку, затоа што секогаш прво ќе мислиш за некој друг“ – рече таа.

Намален ангажман, а за викендите мора да биде дома

Откако стана мајка, Пенелопе значајно го намали сопствениот филмски ангажман, па наместо 3 или 4 филмови годишно како што тоа го правеше во минатото, сега снима само по еден, а во нивното семејство важи правилото дека за викендите треба да бидат дома заедно со децата.

„Секогаш бев на снимање и секогаш играв некој нов лик и не се чувствував многу среќна. Не уживав во работата толку многу... Одев од снимање на снимање. Никогаш не бев дома и немав живот.

Тоа го променив пред 6 години, затоа што не се чувствував среќна. Мора да имаш време за себеси и кога стануваш мајка тоа дополнително ги менува нештата“  - рече Пенелопе во интервју во 2015-тата година.

„Семејството е најважната работа за мене... И ако сакате деца, сакате да ги одгледате сами“ – рече таа.  

Наместо забави и излегување сака да си легне рано

Таа претходно говореше и за тоа дека мошне ѝ е важно да спие по седум часа дневно за да се чувствува одморено, па дури откри дека поради тоа што мора да стане рано заради децата, најчесто избегнува да излегува навечер или да оди на забави, а наместо тоа, се труди да си легне рано.

„Ако не спијам барем седум часа, тоа го чувствувам подоцна. Губам концентрација, станувам раздразлива. Тоа е најтешко кога имате деца – мора да станете рано.

Да одам на вечера или да си легнам? Ако излезам, како ќе се чувствувам утре? Затоа сонот секогаш победува. Претпочитам да му дадам приоритет на одморот за да можам да бидам фокусирана и силна следниот ден“ – вели таа.

Прочитајте и Не ги покажуваат децата, сакаат улоги во ист филм – Факти за Пенелопе Круз и Хавиер Бардем

Б. С. Б. | Црнобело