Македонските навивачи ги преплавија улиците и го потрошија пивото во Букурешт – ја пренесуваат атмосферата за CRNOBELO.com (фото+видео)

Детали

недела, 13 јуни 2021

„Македонците ги преплавија улиците на Букурешт, австријските навивачи се само мирни туристи и сакаат да се сликаат со нас, па дури и пеат македонски песни со нас, а во кафулињата за само неколку часа ни кажаа дека Македонците го испиле цело пиво“ – изјавуваат македонските навивачи за CRNOBELO.com.

Атмосферата во Букурешт се вжештува како што се приближува времето за почетокот на првиот натпревар на Европско првенство во историјата на македонскиот фудбал.

Момците од македонската фудбалска репрезентација во 18 часот ќе испишат историја на теренот во Букурешт, додека македонските навивачи со цело срце и душа ќе ги бодрат од трибините на стадионот и пред малите екрани.

Македонските навивачи цел ден „се загреваат“, ја пеат химната на Македонија и со нетрпение очекуваат да ги видат момците на терен.

Неколку навивачи ни ја пренесуваат атмосферата од Букурешт:

„Одлична атмосфера, преполни улици и кафулиња, добра храна и уште подобро регулирани протоколи и тестирања. Сѐ се одвива навистина брзо и еуфорично. Има доста туристи од Австрија, но многу повеќе наши, со знамиња, дресови, песни во поход по успех на првото Европско! Како цела Македонија да е преселена во Букурешт. Сите се надеваат на поволен резултат, што само го зголемува притисокот, но сепак најбитна е атмосферата! Од тест центрите се упатуваме кон некој од баровите во стариот град, а од таму директно на стадион!“ – изјави за CRNOBELO.com Едо од Скопје.

фото: приватна архива

„Денес збирно место е кафулето Distrikt 41 во Стариот град. Атмосферата е луда и еуфорична, на улиците врие од Македонци кои го преплавија Стариот град и кафулињата. Македонците се во многу поголем број од Австријците, па некои од нив се сликаат со нас, па дури и пеат македонски песни со нас. Во кафулињата снема пиво за неколку часа, а Романците ни рекоа вие Македонците го испивте цело пиво. Вчера по 12 часот се купуваше пиво од трафики. Денес е уште поеуфорично, а веќе неколку часа пред натпреварот се собираме во фан зоната!“ – изјави за CRNOBELO.com Андреј од Пробиштип.

фото: приватна архива

девојката на фудбалерот Дарко Велковски, Тамара Чуприна (десно)

„Влегува Кавадарчанец во еден од кафиќите што беа окупирани од Македонци и вика, овие неспремни ги фативме како ланскиот снег. Испиени беа тони пиво за неполни неколку саати. Делириум низ стариот град, а Австријските навивачи се само мирни туристи и сакаат да се сликаат со нас. И Романците навиваат за нас, тоа е најважно!“ – изјави за CRNOBELO.com Виктор од Скопје.

фото: приватна архива

Уште неколку видеа кои кружат на социјалните мрежи од вжештената атмосфера во Букурешт:

?s=19&fbclid=IwAR2T5CE6e3soOFqu72qUexu6P5hSktha3ulyFhqkUIV5fmt9TeHM5yRbnK8

?s=19&fbclid=IwAR07A_lJL_UQ0GQ2ZbYBj2N8Q_Lf8HehSR7dIGMn14-pzcJinXJqyOLigKo

М. М. | Црнобело