Детско писмо до непознато другарче во Србија стопли многу срца

Детали

петок, 23 мај 2014

Се чини дека не постојат зборови со кои би можело точно да се опише како се чувствуваат луѓето кои се поплавени во Србија и регионот. Многу деца во прегратките на своите родители и спасувачките екипи среде ноќ ги напуштаа поплавените домови кои се уништуваа пред нивните очи.

Со своите љубопитни и исплашени очиња ги гледаа мајките како плачат и загрижено  бараат прибежиште бегајќи од куќата само со  најнеопходните работи. Меѓу нив нема место за играчки, камиончиња, коцки, мечиња, кукли...

Дечињата се оние кои најмногу страдаат. Но, знаат да бидат и сочувствителни. Не само оние кои страдаат, туку и оние кои тоа го гледаат некаде далеку.

Така, едно мало момче по име Доминик од Самoбор се сетило да напише писмо и како подарок да ја испрати својата играчка за некое непознато детенце кое ја изгубило во поплавите.

Фотографијата со писмото ги обиколи мрежите Фејсбук и Твитер и допре многу срца.

„Драго непознато другарче, јас се викам Доминик. Имам 8 години и живеам во Сaмoбор. Жал ми е што си морал да ја напуштиш својата куќа, па затоа ти ја праќам мојата играчка како мал подарок. Можеби еден ден ќе се запознаеме. Доминик“ – гласи пораката на малото момче.

Овој убав гест на Доминик сигурно ја вратил насмевката на лицето на она дете до кое стигнало писмото, а кај сите други ги врати вербата, љубовта, сочувството и хуманоста.