Швајцарско село како од бајките сака да стане хотел како последна сламка за спас

Детали

недела, 14 октомври 2018

Швајцарското село Корипо изгледа како да е верзија на селцата од приказните на браќата Грим, но жителите се соочени со суровата реалност.

Некогаш Корипо било просперитетно земјоделско место, каде 30-тина луѓе постојано обработувале земја и одгледувале градинарски култури и стока. Денеска има постојани 12 жители, од кои 11-мина се над 65 години. Единствен остаток од стопанство таму е еден локален ресторан.

Поради тоа, ова прекрасно село е пред финансиски колапс. Сепак, тие не се предаваат. Локалната фондација предложила селото да се претвори во хотелски комплекс, а напуштените куќи и згради да се претворат во викендици, бунгалови и вили.

На тој начин тие веруваат дека ќе го спасат ова уникатно селце, сместено во густа шума, со специфична автентична архитектура. Една од куќите веќе е отворена како сместувачки капацитет, а наскоро ќе се реновираат и прилагодат уште повеќе објекти.

Целиот проект ја чини Швајцарија 6,5 милиони долари буџетски средства за проширување и обнова. Сите јавни објекти како цркви, театри, пекарници и селски организации ќе бидат реновирани и адаптирани.

За овој проект има и голем меѓународен интерес, а оттаму се надеваат и дека ќе мотивираат помлади дуѓе да се преселат во селото, за да можат да управуваат со хотелот. Уште еден проблем што ќе треба да го решат е водоснабдувањето, а планот е понатаму да се привлечат и трговци кои ќе отворат продавници од своите синџири и во Корипо.

Е. Д. | Црнобело