Шпанците живеат повеќе од 70 години во погрешна временска зона?

Детали

понеделник, 30 септември 2019

Еден од стереотипите што секогаш се издвојува за Германците е нивната точност. Од друга страна, секогаш кога зборуваме за Шпанците, се потенцира дека тие секогаш доцнат.

Точно е дека Шпанците започнуваат да работат подоцна, и дека излегуваат само по десет часот навечер, но тоа не е последица на јужниот менталитет.

Туристите се убедени дека Шпанците едноставно се такви и дека животот за нив започнува подоцна. Ова честопати му се припишува на медитеранскиот менталитет.

Сепак, причината за нивното „постојано доцнење“ е многу различна - Шпанците живеат повеќе од 70 години во погрешна временска зона!

Кога ја гледате мапата, според логиката на нештата, часовникот во Шпанија треба да го покаже времето како во Велика Британија, Португалија или Мароко, што го пресметуваат времето според Гринич.

Но часовникот го покажува истото време како и часовникот во Скопје (Централно-европско време), иако е Мадрид оддалечен повеќе од 2.000 километри.

Значи, да се обидеме да одговориме на прашањето зошто Шпанците живеат во погрешна временска зона?

За почеток, да се вратиме во 1940 година. Тогашниот сојузник на Хитлер, генерал Франциско Франко, ја сменил временската зона, поместувајќи го часовникот еден час напред, за да се солидаризира со нацистичка Германија.

Шпанците, кои биле опустошени од последиците на граѓанската војна, дури и не ја забележале промената, па едноставно продолжиле со своите навики. Но како што се движел часовникот, ручекот, кој требало да се јаде во 1 часот попладне, одеднаш започнал во 2 часот попладне.

По Втората светска војна, часовникот едноставно не се вратил назад.

Класичниот работен ден започнува во 9 часот наутро, проследено со пауза од 14 до 16 часот. После тоа, вработените се враќаат на работа каде остануваат до 8 часот навечер, така што социјалниот живот започнува, логично, дури после 10 часот.

Доцното изгрејсонце е голем проблем во зима, така што во Галиција, на северот на земјата, сонцето изгрева дури во 9 часот. Дали часовникот ќе се врати во блиска иднина, или Шпанците сепак ќе го задржат времето на Централна Европа, ќе покаже само времето.

Ашера | Црнобело