Несекојдневна глетка: Александрија во Египет под снежна покривка, по речиси една деценија (фото+видео)

Детали

вторник, 21 декември 2021

Жителите на Александрија во Египет имаа можност да уживаат во можеби првиот снег во градот по цела деценија. Додека тие радосно споделуваат фотки и видеа на социјалните мрежи, експертите предупредуваат дека ова е најверојатно резултат на климатските промени и во Египет ги очекува многу студена зима.

Египетскиот град Александрија е покриен со снежна покривка – нешто за коешто жителите велат дека не се случило речиси една деценија. Последната снежна бура што го зафати Египет беше во 2013 година.

Уште за време на викендот, локалните власти ги предупредиле жителите за нестабилните временски услови, па дури и затвориле некои училишта поради бурата со врнежи од дожд и снег.

Наводно, бурата „пристигнала“ од Европа и додека во повеќето градови имало обилни врнежи од дожд, во Александрија и околните области паднал и снег. 

Социјалните мрежи речиси веднаш се преплавија со фотографии и видеа од несекојдневниот настан, а жителите истакнуваат дека речиси и да го немаат видено градот со снежна покривка.

Некои дури и се шегуваат дека не знаат дали на фотките е Египет или Европа.

Поради местоположбата, во Египет има пролет, лето, есен и зима, но зимските температури се повисоки и нема услови за снег.

Наводно во зимските месеци температурата може да се спушти до 10 степени, а пониска е само на повисоките места. На дестинациите како Шарм ел Шеик, температурата во зима може да се искачи и до 20-тиот степен.

Зимите обично се топли и со многу врнежи од дожд, но одвреме-навреме, како сега, може да заврне и снег.

Според некои експерти, овие врнежи се резултат на климатските промени и наводно Египќаните треба да се подготват за многу постудена зима од вообичаено.

Повеќе фотки и видеа од Александрија под снег на следната страница...