Англичанец сам ја породил партнерката, откако од болница ги вратиле дома: „Ме водеше родителскиот инстинкт“

Детали

вторник, 04 јануари 2022

Немал никакво медицинско искуство, но младиот Англичанец морал сам да ѝ помогне на неговата девојка да се породи, откако претходно од болница ги вратиле дома да чекаат почести контракции. Вели дека тоа е „слика што долго време нема да ја заборави“.

Џејд Путни (24) и Сем Кeслдајн (25) од Англија успеале сами да го доведат на свет својот син откако сфатиле дека немаат доволно време за да се вратат во болницата од каде ги вратиле дома да чекаат контракциите да почнат да се случуваат на почести временски интервали.

Гордите родители за британските медиуми раскажуваат како неколку дена по Божиќ, Џејд рано го разбудила Сем и се жалела дека има болки во грбот, па верувала дека тоа се рани контракции.

Го оставила партнерот да спие, но по 3 часа се вратила и му кажала дека болките стануваат посилни.

По ова веднаш отишле во болница, но, оттаму ги вратиле дома и им рекле да се вратат кога контракциите ќе почнат да се јавуваат на пократки временски интервали.

„Кога се вративме дома, таа отиде во спалната соба за да се одмори, а јас во дневната гледав филм додека чекав. Но, добив порака во која ми кажа дека ѝ требам и ја најдов во тоалетот до спалната соба, а воденикот ѝ беше пукнат“ – раскажува таткото Сем.

По ова Сем и Џејд се обиделе брзо да стигнат до болницата, но кога се обидувала да влезе во автомобилот забележала дека од воденикот почнала уште посилно да истекува течност и тоа ги натерало да се вратат во домот.

Џејд му рекла на партнерот дека чувствува нешто меѓу нозете и го замолила да провери, а Сем вели дека кога погледнал видел дека главата и рамената на бебето веќе во целост биле излезени.

„Навистина беше чудно тоа што веќе неговата глава беше надвор, а очињата почнуваа да му се отвораат. Не верувам дека таа слика ќе ја заборавам уште долго време.

Само ѝ објаснив каква е ситуацијата и ѝ реков да почне да турка, а јас ќе ѝ помогнам да се породи“ – раскажува таткото.

Но, кога се родило малото бебе, тие увиделе дека бебето не плаче, а папочната врвка му била во целост завиткана околу вратчето. 

Првиот плач на нивниот син Фреди го слушнале откако успеале да го одмотаат од врвката, по што Сем веднаш тргнал да ја викне мајка му за да им помогне.

На враќање кон дома, Сем видел полициски автомобил и веднаш се фрлил пред него за да побара помош. Набрзо потоа пристигнала и брзата помош што ги однела мајката и бебето во болница каде било потврдено дека двајцата се добро и уште истата вечер ги пуштиле дома.

„Сепак, тоа беше мошне трауматичен ден за нас“ – вели таткото.

Сем вели дека иако немал медицинско искуство, сепак верува дека родителскиот инстинкт го водел како да се снајде во ситуацијата.

Напоменува дека дури подоцна станале свесни за хоророт што го преживеале и колку многу имале среќа што бебето се родило здраво и живо и приказната имала среќен крај.

Дури откако се вратиле од болница, Сем и Џејда почнале да плачат размислувајќи за сите несакани последици што можеле да произлезат и заради ужасот што го поминале.

Како што вели и самиот, никогаш не ни помислувале со партнерката сами дека ќе го донесат на свет нивното дете, па тоа што тие двајцата успеале да го направат тоа без никакви посериозни последици, според нив е вистинско чудо.

Б. С. Б. | Црнобело