Мудра приказна за човекот кој тргнал во потрага по вистината за животот

Еден човек тргнал во потрага по вистината за животот. Патувал од место до место, сè додека не стигнал во едно село...

Во тоа село го советувале да влезе во една пештера и на тој начин да ја бара вистината. На влезот во пештерата сретнал мудрец, кој му рекол дека на крстосницата меѓу селата ќе го најде она што го бара.

Полн со надеж, човекот оди на крстосницата меѓу трите села и наоѓа три продавници. Во едната се продава метал, во другата дрво, а во третата тенка жица. Но, тој не можел да сфати како ова има врска со неговата потрага. На тоа, мудрецот му рекол: „Ќе сфатиш во иднина“.

Човекот бил упорен и барал објаснување, но мудрецот молчел. Се налутил и си заминал.

Поминале неколку години и сеќавањата на таа потрага избледеле. Една вечер, човекот шетал и чул прекрасен звук, нежна мелодија која го трогнала. Му пришол на музичарот.

Тогаш забележал дека инструментот е изработен од дрво, метал и жици. Тогаш му станала јасна пораката на мудрецот. Ние веќе имаме сè што ни е потребно. Нашата задача е да го составиме и да го користиме на правилен начин.

Ништо нема смисла ако се набљудува како раздвоени делови, но кога тоа ќе се поврзе, сè добива смисла.

Е. Д. | Црнобело