Направете и подарете честитка

Рачно направената честитка секогаш значи повеќе од купечката, без разлика колку интересни картички сте виделе низ продавниците.

Со малку труд и вие може да направите нешто допадливо и да го употребите во скоро секоја прилика.

Превиткајте лист на половина, изберете големина и тип хартија по желба. На средина на листот нацртајте срце или друга форма со молив, повторно изберете големина по желба.

Од друг лист исечете иста форма како нацртаната и на неа направете колаж. Наједноставно е да користите различни парченца шарена хартија, но може да додадете и друг материјал или да доцртате нешто. Потоа само залепете го колажот на означеното место во честитката.

Звучи крајно едноставно, а нуди толку многу можности. Играјте си со боите на основната хартија, со формите, боите и материјалите на колажот, додадете машничка, рачно напишана порака и дотерајте ја честитката по свој вкус.

Повештите веднаш може да ја надградат оваа основна идеја, а крајниот резултат сигурно ќе ја израдува личноста за која е наменета оваа рачна изработка.