Подгответе: Црни чоколадни палачинки

Ако сте љубители на палачинки вреди да испробате нешто поинакво – црни палачинки. Еден од омилените десерти на светот, во малку поразлична варијанта.

Што ви е потребно:

За тестото:

• 60g чоколадо за готвење
• 2 лажици путер
• 3 јајца
• 45g шеќер
• Малку сол
• 320ml млеко
• Половина ќесичка ванилин шеќер
• 2 лажици како
• 150g брашно

За филот:

• 200g бело чоколадо
• 250ml слатка павлака
• 50g шеќер во прав
• 1 банана
• 2 киви
• Неколку јагоди или малини

Подготовка:

Растопете ги путерот и чоколадото на пареа, со постојано мешање, а кога ќе се стопи чоколадото, тргнете ги од оганот. Во голем сад матете ги јајцата, додадете шеќер и сол, млеко, ванилин шеќер, брашно и какао. Матете додека да добиете глатка смеса, без грутки. Полека истурајте го стопеното чоколадо со постојано мешање. Смесата оставете ја да отстои половина час во фрижидер, а пред пржење, нека постои малку на собна температура.

Правете ги палачинките во подмачкано загреано тавче. Белата чоколада растопете ја и измешајте ја со изматената слатка павлака и шеќерот во прав. Ставете го филот на палачинките, распоредете го овошјето и уживајте во ова слатко задоволство!

Напомена: Можете да комбинирате и друг тип на фил по избор.