Не му го давајте на детето товарот на вашиот неизживеан живот

Најголемиот товар кое детето го носи е неизживеаниот живот на родителите, рекол Карл Г. Јунг.

Народските дефиниции кај нас се попросто објаснети – Каков татко-таков син, каква мајка-таква ќерка.

Доколку мислите дека родителите кои ги напнуваат своите малечки да бидат исти како нив па дури и поуспешни, се само обичен мит, се лажете.

Родителите кои очајно ги буткаат своите деца напред се најчесто оние кои не успеале да ги исполнат своите соништа. Ова го потврдија и истражувањата.

Секако, не сите родители сакаат чувствата на незадоволство и разочарување од сопствениот живот и неуспех да ги рефлектираат на своите деца и да очекуваат од нив тие да ги поправат нивните грешки.

„Оние кои го прават тоа ги гледаат своите деца како еден вид екстензија, продолжување на самите себе, а не како индивидуални луѓе со свои надежи и соништа“, изјавува професорот по психологија Бред Бушман на Државниот универзитет Охајо.

„Овие родители сакаат нивните деца да ги остварат соништата кои тие самите не успеале“.

Оваа теорија држи вода, бидејќи постојат многу примери кои ја потврдуваат, како од реалноста, така и од светот на славните и познатите.

Земете го за пример познатиот тенисер Енди Мареј, чија кариера вртоглаво ја надмина онаа на неговата мајка Џуди.

Таа на почетокот го тренирала, а и ден-денес може да се забележи како жестоко навива на терените и гласно довикува совети што треба тој да направи.

Останува да се запрашаме дали без нејзината упорност и поддршка Мареј би бил добар тенисер, но уште поважно – дали тој воопшто сакал да стане тенисер?

Познавате ли доктори и адвокати кои не си ја сакаат својата професија, но морале да го истуркаат факултетот, само затоа што потекнуваат од докторска или адвокатска фамилија?

Или архитектот кој сака да биде ликовен уметник, но не смее да ги разочара генерациите архитекти пред него?

И додека некои деца неминовно одбираат да ја следат кариерата на своите родители, сепак е најважно самите да ја пројават таа желба и да го направат тој избор.

Не е добро кога родителите им влијаат на таа одлука по секоја цена, а уште полошо кога се обидуваат да создадат мала, подобра, поусовршена верзија од себеси.

Бидејќи колку и да мислите дека ваквите процеси ви носат гордост и исполнување како родител, заборавате дека во нив се губи вашето дете кое ќе порасне во човек без ронка индивидуалност.

(О)Милена | Црнобело