Фрази кои ќе ви помогнат да го научите детето да биде послушно

Сите родители имаат неколку фрази кои постојано ги повторуваат, како што се „Не плачи“, „Престани да го правиш тоа“, „Веднаш да се извиниш“ и слично.

Но, понекогаш, иако мислат дека со нив имаат авторитет, сепак детето одбива да послуша.

Тоа е така бидејќи повеќето од овие фрази предизвикуваат одбивност кај детето, а вие како родител, треба да пристапите на подобар начин со кој ќе го надитрите.

Погледнете неколку фрази со кои ќе го „натерате“ детето да биде послушно:

„Кога ќе ја завршиш домашната ќе одиме на прошетка“, наместо „Веднаш оди да пишуваш домашна!“

Нагласете им го на децата позитивниот настан кој ги очекува по она што не сакаат да го прават, наместо да им правите уште потешко кога им наредувате да прават нешто што не им е омилено.

„Покажи ми како да си ги измијам правилно забите“, наместо „Пак заборави да ги измиеш забите!“

Преправајте се дека сте заборавиле како се прави нешто и натерајте го детето да ви покаже како се прави, така што и самото ќе го направи тоа што вообичаено не го сака.

Тоа им помага да се чувствуваат корисно, наместо да мислат дека извршуваат здодевни обврски.

„Ти ме праша, јас ти одговорив“, наместо „Ти реков не, колку пати да ти кажам?“

Кога детето неколкупати ќе ве праша дали може да му купите нешто, наместо веднаш да го одбиете и искарате, смирено кажете му дека тоа ве прашало, а вие сте го дале вашиот одговор.

„Кој сака да биде главен асистент во кујната?“, наместо „Ако ми помогнеш, ќе ти купам играчка“

Поткупувањето на децата нема да ги научи на ништо добро и не е начин да го натерате детето да помогне во домашните обврски.

Мотивирајте го и потсетете го на минатото кога ви помогнало, па заблагодарете се и направете да се чувствува корисно.

Потоа, наместо да му наредите да ви помогне во кујната, направете му на детето да помисли дека има некоја главна улога при завршувањето обврски.

„Прави го тоа што треба“ наместо „Престани да го правиш тоа“

Мозокот на децата е програмиран да ги тера да го прават тоа што го кажувате. Па така, наместо „престани да трчаш“, кажете му на детето „твоите нозе се изморени и сакаат да одиш побавно“.

„Ајде да ја поправиме грешката“, наместо „Извини се веднаш“

Кога децата ќе направат нешто погрешно, најчесто родителите веднаш ги тераат да се извинат, пред тие да сфатат што всушност направиле.

Затоа, прво покажете му на детето што згрешило и заеднички најдете начин да го поправите тоа, а потоа тие ќе знаат дека се виновни и ќе почувствуваат потреба да се извинат.

„Знам како ти е и мене ми се случило“, наместо „Гледаш, ти реков!“

Кога детето ќе направи нешто што вие можеби сте предвиделе, немојте веднаш да го карате и обвинувате, туку дајте му поддршка и кажете му дека знаете како му е бидејќи и вам ви се случило, но подучете го за во иднина.

Па така, ставете го на ваше место и кажете му дека кога била средена масата, полесно сте пишувале домашна, или кога сте јаделе почесто сладолед од супа, ве болеле забите.

М. М. | Црнобело