Како им влијаат на децата родителите кои цел ден се загледани во екраните?

Сите деца го следат примерот кој им го даваат нивните родители, а тоа важи и кога се во прашање навиките за користење на паметните уреди.

Низа истражувања сугерираат дека забавувањето на родителите со игри на мобилен телефон, наместо да набљудуваат како нивното дете гради, на пример кули во песок, штети во меѓусебниот однос.

Тоа понатаму може да доведе и до проблем во однесувањето на децата. Недоволната поддршка и комуникација со родителите резултира со фрустрации или хиперактивност. Децата цимолат, лути се и покажуваат бес.

Кога родителот е загледан во екранот од мобилниот телефон, тој практично го запоставува своето дете. Комуникацијата е прекината и тоа влијае врз личноста во развој да се чувствува отфрлена и несакана, што понатаму носи и други несакани последици со однесувањето и општата ментална состојба.

За жал, ваквите ситуации воопшто не се ретки во денешно време, кога, може да се каже, сме зависни од технологијата и од своите паметни телефони.

Многу родители на овој начин го компензираат незадоволството од реалниот живот и мислат дека се релаксираат и одмараат додека играат игри на телефоните или се активни на социјалните мрежи.

Некои истражувања во оваа област покажале дека колку родителот е понезадоволен од реалноста, толку повеќе се посветува на дигиталната технологија.

Нештата одат дотаму што некои родители се одмараат од сопствените деца, заборавајќи колку всушност е клучна физичката присутност во текот на растот и развојот.

За ова да се спречи, најпрво родителот треба да биде свесен што се случува додека само „сурфа“ преку својот телефон или таблет.

Во тие моменти детето гледа како личноста која најмногу ја сакаат е посветена на нешто сосема друго. Затоа, наместо читање вести преку апликации, подобро е родителот да ги прочита од печатен дневен весник или списание, бидејќи не постои ризик да се „занесе“ во содржината.

Слободното време треба да биде што повеќе посветено на детето, на градење заеднички спомени и зацврстување на блискоста.

Е. Д. | Црнобело