Како да му помогнете на вашето дете да ја надмине срамежливоста?

Срамежливоста кај децата е нормална појава но доколку е претерана, може да му причинува проблем на детето. Претераната срамежливост може да го отежни создавањето нови пријателства, но и да ја намали самодовербата на детето.

Познато е дека сите деца минуваат низ срамежлива фаза, која обично e најизразена помеѓу втората и третата година. Ова е период кога децата чувствуваат страв од непознати личности и нови ситуации.

Важно е да знаете дека некои деца едноставно потешко се опуштаат во нови ситуации. Бидејќи детето го наследува темпераментот од двајцата родители, можно е и срамежливоста да биде наследна.

Срамежливите деца всушност се многу повнимателни и потребно им е време за да се почувствуваат удобно во нова ситуација. Најчесто срамежливите деца бараат засолниште кај некој возрасен, избегнуваат контакт со очите, молчат или одговараат со многу тивок глас.

Кога срамежливоста станува проблем?

Најпрво немојте никако да му викате на вашето дете поради неговата срамежливост. Критиките нема да го охрабрат, туку само ќе ја влошат ситуацијата.

Срамежливоста почнува да претставува проблем дури кога детето ќе почне да избегнува и ситуации кои го интересираат.

Иако претераната срамежливост може да биде проблем, тоа не значи дека детето не може да ја надмине. Во овој случај, најважна е вашата поддршка. Секогаш кажувајте му на детето каде ќе одите и со кого ќе се сретнете, така што тоа ќе има време да се подготви за настанот.

Поддршка од околината

Бидејќи е почеток на учебната година, доколку вашето дете има проблем со срамежливост, добро би било да отидете со него до училиштето неколку пати. Прашајте го што е она што најмногу го плаши и раскажете му за активностите што го очекуваат. Исто ќе ви помогнат и следниве совети:

Покажете разбирање

Важно е да му покажете на вашето дете дека не е само во таа ситуација. Па, слободно изговорете го она што мислите дека се случува. Доколку мислите дека детето се срами од одредена личност, прашајте го дали станува збор за тоа.

На овој начин ќе му покажете дека го разбирате и ќе сфати дека не е само.

Нормализирајте ја ситуацијата

Доколку му покажете на детето дека срамежливоста не е ништо необично, многу полесно ќе ја надмине. Кажете му дека е нормално да му биде потребно време и поддржете го во тоа што прво сака да разгледа пред да направи нешто.

Охрабрете го детето

Во овој случај ќе ви помогне разговорот за нешто што детето го сака. До непријатните ситуации, обидете се да го потсетите детето на неговата вредност и неговите квалитети. На овој начин ќе му ја вратите самодовербата и полесно ќе се справи со новата ситуација.

Спирова С. | Црнобело