Заборавете на срамот: Што треба да направите веднаш по туширањето?

После топлиот туш, веројатно првото нешто кое ви паѓа на ум е да се обвиткате со мек пешкир или наметка. Пред кожата да ви се наежи од студениот воздух во бањата, или, пак, за да го избегнете одразот на своето голо тело во огледалото. Но, пред да посегнете по пешкирот, направете го следното.

Експертите се согласни дека за вашата самодоверба, најдобро е првин да се погледнете во огледало од сите страни, штом исчекорите од тушот.

Така е. Додека сте сосема голи и во својот полн сјај.

Тоа ќе ве направи помалку негативни кон своето тело, нормализирајќи ви го доживувањето на истото, пренесува страницата Yahoo Health.

Зошто го одвраќаме погледот од огледалото? Постојат две причини поради кои луѓето избегнуваат да се погледнат во огледало после капењето.

Првата е забележувањето на своите несовршености пред било што друго.

Втората, пак, затоа што автоматски се споредуваме со другите, особено со нереалистичните прикази за човечкото тело во медиумите.

„Општеството нѐ научи постојано да размислуваме за начини на кои би се подобриле себеси. Меѓутоа, колку повеќе се фокусираме на своите маани, толку повеќе тие се зголемуваат во нашите очи. А, тоа нѐ принудува да избегнуваме секaкво набљудување на сопствените тела.", истакнува психологот Sari Shepphird.

Покрај редовна „проверка“ во огледалото, експертите препорачуваат да направите и една кратка вежба за зајакнување на самодовербата:

Именувајте пет позитивни работи на вашето тело. Тоа може да бидат нештата за кои сте благодарни, или, пак, оние делови од телото кои сакате да ги гледате. Може да биде било што – од бојата на очите до педикирот на кој сте отишле пред неколку дена – сѐ додека е нешто позитивно.

Ако имате проблем со смислувањето на тие пет работи, тогаш темелно размислете за убавите коментари и комплименти кои сте ги добиле од другите луѓе за вашето тело.

А, доколку стравoт од гледање на сопственото тело ви е поголем од сѐ од наведеното, обидете се да започнете со оваа вежба за самодоверба еднаш неделно, наместо да ја практицирате секој ден.

Полека напредувајте низ седмиците, постепено зголемувајќи го бројот на вежбите.

Иако тоа подразбира само минорна промена во вашата рутина, може да има исклучителен ефект, што ќе ве трансформира како личност.

Затоа, не ризикувајте да паднете на мокрите плочки. Наместо да мижите и трчате кон пешкирот после туширањето, почестете го вашето тело со пет комплименти.

Секој ден ќе си бидете сѐ повеќе и повеќе благодарни.

 М. А. | Црнобело