Како да одберете соодветен накит според обликот на лицето?

Според шминкерите, фризерите и фотографите, овалното лице е идеална форма, бидејќи се смета дека може најдобро да се експериментира со него.

Под експериментирање, се мисли на шминката, фризурата, но и накитот.

Сепак, не сите може да имаат идеална форма на лице, а и ретко кој знае дека постојат правила за бирање на накит според обликот на лицето.

Но, за да може да изгледате беспрекорно во секое време, добро би било да обрнете внимание и на тоа.

Заобленото лице може визуелно да се издолжи со помош на накит, острите црти пак, може да се ублажат и изгледот може да биде многу подобар доколку правилно го одберете типот на обетки, ланче или додаток за коса.

Во продолжение, погледнете каков накит треба да бирате за да ги нагласите предностите или сокриете недостатоците.

Кој е вашиот облик на лице?

Заоблено лице

Обетки – Издолжени обетки кои висат се идеален избор за заоблено лице за визуелно да го издолжат. Обетки во облик на триаголник или дијамант се исто така добар избор.

Ланче – Избегнувајте ги чокерите и заоблените ланчиња кои личат како да ве „гушат“ и држете се до елегантни приврзоци или издолжени синџирчиња со V-облик.

Додатоци за коса – За визуелно да го издолжите и истенчите лицето, носете аксесоари со средна големина и подигнете ја косата од задниот дел.

Триаголно лице

Обетки – За да се ублажи острата форма на лицето, најдобро е да не носите големи обетки, туку елегантни мали обетки кои нема дополнително да ве издолжуваат.

Ланче – Наместо ланчиња со приврзоци и други додатоци кои висат, одберете такви во облик на колан за околу врат, со нежни бисери или сјајни камења за да ја неутрализираат острината на брадата.

Додатоци за коса – За да ги ублажите острините на лицето, носете заоблени елементи кои немаат дополнителни додатоци кои ќе се истакнуваат и стрчат.

Коцкесто лице

Обетки – За да ги ублажите острините и да го раширите визуелно лицето, најдобро е да носите обетки во облик на солза, но запомнете дека нивната должина треба да е поголема од ширината.

Ланче – Најдобро е да носите долги ланчиња со дополнителен приврзок, мали каменчиња или бисери и избегнувајте хоризонтални линии и масивни елементи.

Додатоци за коса – Широко венче или трака со нежни линии кои ќе ги ублажат острите црти, а ако има дополнителни аксесоари поставете ги асиметрично.

Трапезоидно лице

Обетки – Триаголни обетки свртени со врвот надолу се добар избор или ако лицето е премногу остро, мали заоблени обетки ќе го омекнат, а долгите пак, ќе го издолжат лицето каде што е потребно.

Ланче – За да се прошири визуелно долниот дел од лицето, носете долги ланчиња со V – израз или со долг додаток и приврзок.

Додатоци за коса – Широко венче со големи декоративни елементи визуелно ќе го балансира горниот дел на лицето со долниот.

Овално лице

Обетки -  Носете мали висечки обетки со заоблени или коцкести форми, или триаголни со врвот нагоре, но долгите висечки обетки избегнувајте ги максимално.

Ланче – Ланчињата како колан околу врат и оние кратки но волуменозни се она што ви е потребно, а долгите синџири уште повеќе ќе ве издолжат, па избегнувајте ги.

Додатоци за коса – Најдобра опција е да ставите голема декорација на страната на косата за да дадете волумен на образите, комбинирано со убави локни.

М. М. | Црнобело