Девојки објавуваат реални фотки од нивното лице – борба против фотошопирана кожа на Инстаграм фотки

Нереалните стандарди поставени од жените кои користат премногу Фотошоп на социјалните мрежи и на рекламите за убавина, ги натера „нормалните“ жени да започнат кампања во која си го откриваат лицето без шминка и филтри, со цел да им дадат самодоверба на сите оние кои ја изгубиле, гледајќи ги лажно совршените лица на нивните идоли.

Социјалните мрежи прикажуваат многу нереална слика за инфлуенсерките и славните личности кои објавуваат фотографии од нивните наводно совршени лица, без ниту еден недостаток.

Но, покрај секојдневните фотки на инстаграмџиките, дури и оние фотки на кои се рекламираат производи за убавина, сепак имаат тон филтри и Фотошоп на нив, па девојките кои ќе ги пробаат на себе овие производи, често се разочаруваат од тоа што немаат ист изглед како оној на Инстаграм фотките.

За таа цел, шминкерката Саша Луис Палари уште летото 2020-та започна вирален предизвик #FilterDrop, односно кампања со која ги охрабрува жените да објавуваат фотки од нивните природни лица.

Прочитајте и Македонка го покажа лицето со акни: „Излезете надвор со крената глава и без шминка“

Освен што предизвикот вирално се прошири, Саша отиде чекор подалеку – таа се пожалила во Агенцијата за стандарди во рекламирање во Велика Британија, и по неколкумесечка борба таа конечно добила позитивен одговор од нив.

Сега во стандардите за рекламирање е вметнато дека е забрането преувеличување на ефектот од производот, кој води до заблуди. Ова е одлична вест во свет во кој лажната и нереална страна преовладува на социјалните мрежи. Следат позитивни промени.

„Предизвикот го создадов како продолжение на сето она на што верувам за убавината. Работам во оваа индустрија речиси 10 години и со оваа кампања, го променив начинот на кој ќе се гледа на убавината онлајн.

Пред 6 месеци, разговарав со Агенцијата за штетата која ја прават овие филтри и за тоа дека има потреба од построги правила за тоа како производите и козметиката се рекламира онлајн.

На крајот на јануари 2020-та добив мејл во кој беше нагласено дека според правилата, на брендовите, инфлуенсерите и славните личности им се порачува да не користат филтри на фотографиите во кои промовираат производи за убавина и да не се преувеличува ефектот кој продуктот го постига.

Денес овие правила се ставени во пракса и сето тоа заради оваа кампања“ - стои во објавата на Саша.

Дел од фотографиите на жените кои го објавија своето лице без филтри, сакајќи да ја покажат реалната слика (меѓу нив има и такви кои од многу одамна се борат да ја прикажат реалната страна и за тоа го користат нивниот профил):

М. М. | Црнобело