Стрес, лекови: Што го покачува нивото на кортизол во организмот (и кои се симптомите)?

Стресот е најпознат причинител на покаченото ниво на кортизол во организмот, кој токму поради ова е нарекуван и стрес хормон. Но, постојат и некои здравствени проблеми, како и одредени лекови кои можат да бидат причина.

Кортизолот е нарекуван и стрес хормон бидејќи стресот може да го зголеми неговото количество во организмот.

Повремено сите имаат зголемено ниво на кортизол во организмот бидејќи, сепак, стресот е нормална реакција на закани од потенцијална опасност.

Проблемот настанува кога во телото постојано има високо ниво на кортизол – состојба која може да биде предизвикана од хроничен стрес, но и некои здравствени проблеми.

Вие самите не можете да оцените дали имате зголемено ниво на кортизол, ниту дали причината е стрес или проблем со здравјето. Но, можете да обрнувате внимание на симптомите.

Доколку ги забележите симптомите на зголемено ниво на кортизол, најдобро е да се консултирате со лекар кој ќе може да ви даде точна дијагноза, но и терапија ако има потреба од тоа.

Кои се симптомите на покачено ниво на кортизол во организмот?

Покачениот кортизол може да предизвика низа симптоми, зависно од тоа дали е поради стрес или некој друг проблем со здравјето.

Генерално, повеќето луѓе ги забележуваат следниве симптоми:

• Дебелеење, особено во областа на лицето и стомакот
• Појава на акни
• Задебелена кожа (на пример на лактите)
• Честа појава на модринки
• Црвенило на лицето
• Забавено заздравување на рани
• Слабост
• Замор
• Раздразливост
• Проблеми со концентрацијата
• Висок крвен притисок
• Главоболка

Што може да го покачи нивото на кортизол?

Стрес

Изложеноста на стрес испраќа низа сигнали во телото, поради кои почнуваат да се лачат различни хормони, како адреналин и кортизол.

Кога е под стрес, телото се подготвува да се соочи со потенцијалната закана. Кортизолот ограничува некои функции во организмот кои не се неопходни во оваа ситуација, со цел телото да се подготви за потенцијална одбрана.

Штом оваа закана ќе помине, нивото на кортизол се намалува, а функциите во телото се враќаат во нормала. Но, кога сте изложени на константен стрес, кортизолот не се намалува, а со тоа и некои функции остануваат лимитирани, па се јавуваат проблеми.

Проблеми со хипофизата и надбубрежната жлезда

Хипофизата „надгледува“ и контролира бројни телесни функции преку лачење хормони. Ако има каков било проблем со оваа жлезда, како тумор, може да предизвика лачење на повеќе или помалку хормони, како кортизол.

Надбубрежната жлезда исто така лачи хормони, вклучително и кортизол. Па, кога има проблеми со неа, како тумор, може да се јави намалено или зголемено лачење на одредени хормони.

Несакани ефекти од одредени лекови

Лековите од класата кортикостероиди можат да предизвикаат зголемено ниво на кортизол во организмот ако се пијат во повисоки дози или на подолг период.

Доколку пиете вакви лекови и забележувате симптоми на покачено ниво на кортизол, никако немојте сами да си ја намалувате дозата бидејќи можете да си предизвикате уште посериозни проблеми.

Наместо тоа, консултирајте се со вашиот лекар кој ќе утврди дали треба да ви се промени терапијата.

Спирова С. | Црнобело