Обилен оброк, инфаркт или чир на желудник: Можни причини зошто имате киселини

Ако киселините не ви поминуваат, ги забележувате почесто или стануваат поинтензивни, тогаш можно е да се предизвикани од проблем со здравјето, а не од храна.

Киселините се нешто што сме го искусиле сите, некогаш и по неколкупати во текот на денот.

Кога киселината од желудникот влегува во хранопроводот, предизвикува чувство на горење во градите. Некогаш киселините може да се почувствуваат и во грлото и устата.

Иако ова е честа појава, особено ако имате чувствителен желудник или сте јаделе нешто што не ви годи, има и некои состојби кои предизвикуваат слично чувство.

Ако забележувате и други симптоми или киселините ви се јавуваат многу почесто, а не сте јаделе нешто лошо, тогаш е добро да се консултирате со лекар.

Дел од здравствените проблеми кои можат да предизвикаат чувство на киселини:

Инфаркт

Иако ретко се зборува за овој симптом, инфарктот може да предизвика чувство слично на киселини. Овој симптом почесто се појавува кај жени отколку кај мажи.

Инфарктот обично е придружен и со други симптоми како болка во градите која може да се прошири на рацете и вилицата, отежнато дишење, вртоглавица…

Жолчни камења

Ако имате камења во жолчката, по мрсен оброк може да чувствувате киселини и неколку часови.

Може да се јави и болка во средината или на десната страна од стомакот.

Ако одеднаш почнете да чувствувате силни киселини по оброк, што траат долго, секогаш е добро да се консултирате со лекар.

Чир на желудник

Чирот може да предизвика болка во желудникот, но и киселини ако јадете многу мрсна храна.

Во овој случај може да се јави и подуеност, како и болка која се посилна навечер или помеѓу оброци.

Анксиозност

Анксиозноста може да предизвика проблеми со стомакот, вклучително и киселини.

Покрај киселините, може да чувствувате гадење, па дури и да имате дијареја или констипација ако подолг период сте изложени на стрес.

Спирова С. | Црнобело