Како да го дезинфицирате домот кога некој од семејството има грип?

Откако болниот член на семејството ќе оздрави, препорачливо е да ги замените четките за заби со нови, особено ако ви стоеле на исто место. Исто така, не заборавајте да проветрите, дури и ако надвор е студено.

Ако вие или некој во домот се зарази со грип, важно е да го дезинфицирате домот за да ги заштите другите членови на семејството.

Генерално, вирусот што предизвикува грип може да преживее на површини и до 48 часа, додека на неизмиени раце живее околу еден час.

Што значи, додека имате болен член на семејството, препорачливо е да чистите почесто. Важно е и да го дезинфицирате домот откако болниот член ќе оздрави, во случај да останале вируси на некоја површина.

Неколку совети што ќе ви помогнат:

Исчистете ги површините што се допираат често

Дури и ако сите ги мијат рацете редовно, на површините што се допираат често сепак може да има вируси.

Па, дезинфицирајте ги бравите, прекинувачите за светилките, далечините управувачи… Генерално, сите места во домот што се допираат многу често.

Ако болниот член од семејството бил и во вашиот автомобил, не заборавајте да ги дезинфицирате и неговите брави и површини.

Исчистете ја кујната

Кога имате болен член на семејството, важно е редовно да ги миете садовите што ги користи.

Потоа дезинфицирајте ја бравата на фрижидерот, фиоките и шкафчињата, работната маса, како и мијалникот и чешмата.

Ако имате апарат за кафе или бокал за вода, дезинфицирајте ги и нив.

 

Исчистете ја бањата

Темелно исчистете ги бравите, мијалникот, кадата, тоалетната школка, подовите и дезинфицирајте ги со соодветно средство.

Добро би било да ги замените и четките за заби, особено ако ви стојат на исто место, за да се намали ризикот од зараза.

Исперете ја целата облека и постелнина

Вирусот на грип може да преживее и на меки површини, како облека и постелнина.

Па, штом членот на семејството ќе оздрави, исперете ја неговата постелнина и облеката што ја носел на што е можно повисока температура.

 

Исчистете ги спалните соби

Кога личноста ќе оздрави, дезинфицирајте ја целата нејзина соба, но направете го истото и во другите спални соби.

Како и во останатите простории, фокусирајте се на брави, прекинувачи за светло, масички…

Секако, треба да поминете со правосмукалка и да ги исчистите подовите со средство за дезинфекција.

Исчистете ги електронските уреди

Дезинфицирајте го вашиот смартфон, слушалки, маус, тастатура и сите електронски уреди што ги користите.

Направете го истото и за уредите на другите членови на семејството.

 

Проветрете

Не заборавајте да го проветрите домот, дури и ако е зима.

На овој начин ќе ги отстраните микробите кои можеби се задржале во воздухот, а и добро е да проветрите после чистење со средства за дезинфекција.

Спирова С. | Црнобело