Кавгаџиите се поздрави?

Оние кои ги задржуваат негативните емоции во себе покажуваат симптоми на физички проблеми, додека оние кои се впуштаат во расправии имаат ниско ниво на хормонот на стрес и не чувствуваат никакви тегоби.

Луѓето кои не бегаат од расправии, туку ја искажуваат лутината и бесот се поздрави од оние кои го потиснуваат бесот и се повлекуваат од конфликти, тврдат истражувачите од Институтот за социјални истражувања при Универзитетот во Мичиген.

До овој заклучок дошле анализирајќи податоци од 1.842 испитаници од 33 до 84 години старост. Испитаниците кои чувствувале тензија и биле преплавени со негативни емоции кои ги задржувале во себе покажувале симптоми на физички тегоби, од болки до сериозни заболувања.

За разлика од нив, испитаниците кои се впуштале во расправии во текот на претпладнето, попладне чувствувале апсолутен мир, без ниту еден вознемирувачки симптом. Нивото на кортизол, хормонот на стрес, кај нив бил низок, во однос на испитаниците кои сè задржувале во себе.

Затоа Кара Бридит, раководителот на истражувачкиот тим советува ниту еден конфликт да не се гуши, туку со расправа да се дојде до решение, без разлика дали станува збор за несогласувања со директорот, партнерот, децата или некој од опкружувањето.

Каква е вашата пракса? Ги решавате проблемите со разговор, или ги чувате во себе?