Како работата на тироидната жлезда влијае врз функционирањето на другите органи?

Штитната (тироидната) жлезда влијае на брзината на метаболизмот, односно диктира со кој интензитет ќе се троши таканареченото погонско гориво во телото, т.е. храната.

Зголеменото лачење на хормони од тироидната жлезда се нарекува хипертиреоза и предизвикува најчесто губење на тежина, додека пак хипотиреозата се карактеризира со покачување на телесната тежина.

Општо е познато дека целиот ендокринолошки систем функционира како целина и дека неправилната работа на само една жлезда, може да предизвика низа здравствени проблеми. За жал, лечењето на овие состојби е макотрпно, тешко, често трае доживотно и не секогаш се враќа рамнотежата на хормоните во телото како што била пред да настапи заболувањето.

Работата на тироидната жлезда, исто така, влијае на следниве пет органи во телото:

Мозок - ниските нивоа на хормони од оваа жлезда резултираат со намалена концентрација, заборавеност, анксиозност, па дури и епизоди на депресивност.

Срце - хормоните од штитната жлезда помагаат во контролата на крвотокот, односно движењето на крвните клетки во крвните садови.

Јајници (кај жените) - пореметеното лачење на хормоните триодтиронин и тироксин може да доведе и до нередовни циклуси и овулации, но и нивно изостанување.

Коски - хормоните од тироидата контролираат со која брзина се обновува коскеното ткиво. Доколку овој процес се одвива побрзо отколку нормално, може да доведе до остеопороза.

Кожа - при намалено лачење на хормоните, кожата го губи сјајот бидејќи бавно се обновуваат епителните клетки. Исто така, побавен е и растот на косата и ноктите.

За да ја добиете вистинската слика за работата на вашиот ендокринолошки систем, потребно е да се направи комплетна анализа кај специјалист интернист и ендокринолог. Анализата се прави преку земање крв.

Во зависност од резултатот, специјалистот определува терапија, доза, како и циклус на повторување на анализите, додека да се најде терапијата која одговара и хормоните да се доведат во граници на нормалата.

С. У. | Црнобело