Храна во ултра виолетова боја која треба почесто да ја консумирате

Предвидувањата се остварија, па ултра виолетовата боја и официјално беше прогласена за боја на годината.

Од модните писти па се до тапети за на ѕид, бојата на пурпурот почна да го освојува светот со неверојатна брзина.

„Заразени“ од пурпурно-виолетовата треска, голем дел од познатите експерти за храна одлучија да се приклучат кон овој тренд, преку составување на план за здрава исхрана, особено во пресрет на потоплите денови.

Па доколку сакате да сте здрави, витални, а сепак во мода, тие  препорачуваат да ги вклучите во исхраната следниве продукти:

Капини - преполни со витамин Ц, но и А, Е, К и Б, со лутеин, но и други антиоксиданси кои реагираат со слободните радикали и помагаат во ефикасно пренесување на кислородот низ крвотокот. Капините, заедно со малините, аронијата и рибизлите, спаѓаат во групата на овошја благодарение на кои ги зачувуваме здравјето на срцето, крвните садови, но и добрата меморија.

Боровинки - нутриционистите често велат дека боровинките се суперхрана над суперхраната, поради тоа што се богати со железо, фосфор, калциум, магнезиум, манган, цинк и витамин К, што значи дека ја зачувуваат цврстината на коските. Додавајте ги во овесна каша, во колачи, правете сок од нив или едноставно користете ги за да ја збогатите зелената салата.

Црвена зелка - иако ја нарекуваме црвена, нејзината боја е виолетова. Хранливите бенефити се слични како и со обичната зелка, а содржи повеќе растителни влакна и делува антивоспалително. Многумина сметаат дека овој производ претставува одличен избор за превенција од карцином. Можете да ја јадете како салата, да ја додавате во сендвич или пак да ја јадете свежа.

Лаванда - растение познато по смирувачките својства, кое можете да го користите како состојка во чај или пак да го применувате во ароматерапија или во масла за масажа.

Модра слива - било да е свежа или сушена, таа делува како вистински пробиотик и помага за полесно исфрлање на обработената храна од нашиот организам. Истовремено, богата е со големи количини на витамин А.

Акаи бобинки - иако не се автохтоно растение на нашето поднебје, лесно може да се најдат во повеќе облици во продавниците за здрава храна, во прав, сушени или како додаток во исхраната. Исто така се вкусни и богати со минерали и витамини А, Б, Ц и Е.

Смокви - било сушени или свежи, смоквите се преполни со здрави состојки и се одличен извор на витамини и минерали. Во смоквите со виолетова лушпа има поголема концентрација на здравите материи.

С. У. | Црнобело