Неочекувани заболувања и зарази кои се почести во текот на ладните месеци

Освен што во текот на ладните месеци луѓето почесто настинуваат или добиваат некое вирусно заболување, постојат уште неколку болести кои се почести во истиот период.

Во доцната есен и во текот на зимата се поизразени симптомите на хроничните заболувања, а телото не синтетизира доволно витамин Д, за да го засили имунитетот.

Најдобро што можете да го направите во овој период е да намалите контакти со оние кои се постојано настинати, но и да избегнувате собири на многу луѓе во тесни и загушливи простории.

Во меѓувреме, внимавајте на следниве заболувања:

Габични инфекции

Габичните инфекции, меѓу кои најчеста е кандидата, може да се појави кај жените во вагината и на препоните, но може да биде присутна и на меките делови од телото и во усната шуплина.

Кога е ладно се облекуваме потопло и неретко носиме облека од синтетички материјали. Појавата на кандида исто така е поврзана и со прекумерната употреба на антибиотици и со падот на имунитетот.

Носете полабава облека, избегнувајте синтетички гаќички и најлонски хулахопки. Внимавајте на имунитетот и побарајте лекарска помош доколку се сомневате дека имате кандида.

Кардиоваскуларни проблеми

Кога надвор е ладно, телото мора позабрзано да работи, за да ја одржи нормалната температура, но тоа дополнително го оптоварува кардиоваскуларниот систем. Поради тоа, преку зима се почести срцевите и мозочните удари.

Носете соодветна облека на временските услови и не ги занемарувајте дури ниту најситните симптоми и промени во здравствената состојба.

Проблеми со циркулација

Поради стеснувањето на крвните садови, може да се случи врвовите на прстите да ви посинат. Ако и во текот на годината имате проблеми со студени екстремитети, во зима морате да си помогнете со ракавици и подебели чорапи и да не се изложувате на преголем студ.

Гастроинтестинални проблеми

Во зима зачестуваат и стомачните вируси кои лесно се шират во јавните превозни средства и во канцелариите со слаба вентилација. Исто така, можете да се заразите и при близок контакт со болно лице.

Од друга страна, во зимските месеци јадеме потешка и покалорична храна, што за оние со чувствителен дигестивен систем може да биде шок и да предизвика симптоми слични на труење.

Pseudomonas Aeruginosa

Оваа зараза со име кое тешко се изговара, всушност и не е многу ретка. Може да се „скрие“ во туш-кабина, во топлите базени за спа-третмани, во бањите, па дури и да преживее на гумените обувки што ги користите за да не газите директно на плочките во бањата.

Се манифестира со инфекции на кожата, на очите, во ушите, внатре во носната празнина, па дури и на анусот.

Мигрена

Мигрената преку цела година ги измачува оние кои страдаат, но тоа е особено изразено кога е многу ладно, кога е многу топло, кога времето е променливо... всушност, секогаш.

Причина за тоа е температурната сензитивност на оние кои страдаат од мигрена, како и промените во воздушниот притисок. Една од причините може да биде и пократкиот ден, односно недоволната сончева светлина во текот на зимските денови.

Е. Д. | Црнобело