Кујнскиот сунѓер има повеќе бактерии од тоалетната школка - што да преземете?

Готвењето домашна храна е одлично за здравјето на вашето тело, но не толку здраво за вашата кујна.

Според едно истражување, сунѓерите за миење садови се преполни со штетни бактерии. По анализата спроведена во Германија, истражувачите идентификувале вкупно 362 различни типови на бактерии што може да се најдат на кујнскиот сунѓер.

Тестираните сунѓери во просек имале 45 милијарди бактерии по квадратен сантиметар, што е далеку повеќе од бактериите присутни на тоалетната школка. Сега кујнскиот сунѓер може да го прогласиме за „најголемиот резервоар на активни бактерии во домот". Што е уште поважно, некои од овие бактерии имале „патоген потенцијал", што значи истите може и да ве разболат.

Патогените кои се хранат со храна, а се внесени во кујната од контаминирани производи, на пример зелена салата или сурово месо, најверојатно ќе ги пронајдете и  на кујнскиот сунѓер. Иако многу од нив се безопасни, некои од нив може да предизвикаат симптоми слични на стомачен вирус.

„Иако изложеноста на овие патогени од храната во домот е ретка, оние со послаб имунолошки систем секогаш се изложени на поголем ризик", велат научниците.

Што може да се направи во врска со ова?

Редовното миење на сунѓерите е од исклучителна важност. Натопете го и ставете го во микробранова печка приближно 1 минута и тоа на дневна база.
Ако немате микробранова печка или користите жица, машината за миење садови ќе ја заврши работата.

Една минута во микробранова печка убива 99,99999 проценти од бактериите присутни на сунѓерот, додека за машината за миење садови дава малку послаби резултати. Друга опција е да го натопите сунѓерот во сок од лимон и дестилирана вода, или во малку бел оцет а потоа да го оставите да се исуши.

Освен редовно чистење и одржување на вашиот сунѓер, избегнувањето на бактериски жаришта, како сурово месо, ќе му помогне да трае подолго. Добро чуваниот сунѓер трае еден месец , а доколку забележите дека од него доаѓа непријатна миризба веднаш заменете го со нов.

A. Ш | Црнобело