7-те најголеми заблуди за грипот и вистината зад нив

Грипот е болест што им е позната на сите, а овој период во речиси секое семејство има барем по еден разболен од грип.

Најчесто грипот предизвикува симптоми како висока температура, треска, исцрпеност, намален апетит, болки во мускулите и зглобовите, кашлање и затнат нос.

Грипот треба да го прележите и воглавно нема потреба да одите на лекар. Додека сте болни, најважно е да мирувате и да внесувате многу течности.

И покрај толкавата распространетост, сè уште постојат многу лажни информации и митови за оваа болест во кои нема никаква вистина.

За да го заштитите вашето здравје, добро би било да ги знаете најраспространетите митови за грипот и вистината што се крие зад нив:

Од грип не се умира

Грипот е опасна болест. Иако младите и здрави луѓе ја прележуваат без сериозни последици, грипот може да биде и смртоносна болест.

Ова е ретка појава кај здравите луѓе, но доколку заболената личност страда од некоја хронична болест, грипот може да предизвика компликации.

Познато е дека срцевите заболувања, дијабетесот, заболувањата на бубрезите и некои малигни заболувања можат да се комплицираат поради грипот.

Ако сте вакцинирани, не можете да фатите грип

За жал, ова не е вистина. Воглавно, вакцините ги прават симптомите на грипот поблаги и пократки.

Дали вакцинирањето е успешно не зависи само од вакцината, туку и од начинот на вакцинирање и имунитетот на вакцинираната личност.

Во просек, една од пет вакцинирани личности може да фати грип, но во поблага форма.

Вакцините против грип предизвикуваат грип

Вакцините за грип не предизвикуваат грип. Сепак, постои еден несакан ефект – во рок од 24 до 48 саати од вакцинирањето, можат да се појават симптоми на грип.

Ова значи дека е нормално да почувствувате благо покачување на температурата, кое ќе помине за околу 24 часа.

Врелиот чај е добар лек против грип

Најдобриот лек против грип е мирувањето и внесувањето многу течности, без разлика дали тоа е чај, вода или сок.

Најдобро е да ги избегнувате врелите пијалаци, особено ако ве боли грлото, бидејќи во спротивно само ќе ги влошите симптомите.

Ако имате температура повеќе од два дена, мора да одите на лекар и да пиете антибиотици

Нема потреба од антибиотици доколку не настанат компликации од грипот.

Температурата од грипот трае од 5 до 7 дена. Ако во овој период не настанат компликации, пиењето антибиотици може само да предизвика штета. Истовремено, доколку не се влошуваат симптомите, нема потреба да одите на лекар.

Секојдневното внесување витамин Ц го спречува грипот

Сигурно безброј пати сте го слушнале ова, но секој лекар ќе ви каже дека не е точно.

Туширањето со студена вода ја намалува температурата

Во овој случај подобро е да се туширате со млака вода. Туширањето со млака вода е многу поефикасно во намалувањето на температурата.

Спирова С. | Црнобело