Зошто кламидијата е една од најопасните полово преносливи болести?

Кламидијата е нарекувана и „тивок убиец“, а изгледа има причина за тоа – едно истражување покажало зошто всушност оваа болест е толку опасна.

Последното истражување на Американскиот центар за контрола на болести покажа дека само во САД, 1 од 100 личности ја има оваа полово пренослива болест. Со други зборови, над 1,8 милиони луѓе во САД имаат кламидија.

Уште позагрижувачки е фактот што од сите заболени, дури 400.000 најверојатно не се свесни дека ја имаат болеста, па на тој начин ја пренесуваат на своите партнери.

Важно е да се напомени дека заразените не се виновни за ширењето на болеста, бидејќи кламидијата нема ниту еден симптом што ќе ве натера да се проверите.

„И кај двата пола, кламидијата може, но и не мора, да предизвика намалено ниво на енергија, како и болки, особено за време на уринирање. Но, тешко е да се одреди како ќе се манифестира кај секој бидејќи ниту еден симптом не е исклучиво од кламидија, ниту пак е јасен показател дека ја имате болеста“, вели Мери Џејн Минкин, професорка на Јејл.

Кламидијата е една од најчестите полово преносливи болести и е многу почеста кај жените.

Болеста се пренесува преку вагинален, анален, но и орален секс. Иако многу ретко, личноста може да се зарази со кламидија ако бактеријата дојде до контакт со очите.

Кламидијата не се пренесува преку обичен допир, па не можете да ја „закачите“ со делење пијалаци или храна, бакнување, држење раце, прегратка, кашлање, кивање или од тоалет.

Користењето кондоми е најдобрата заштита од инфекцијата.

Доколку не се лекува навреме, болеста може да предизвика многу проблеми, како инфекција на уретрата, вагината и грлото на матката. Истовремено, кламидијата може да влијае и врз плодноста, и кај мажите, и кај жените.

Кламидијата може да предизвика и воспаление на внатрешните полови органи, кое е навистина болно.

За среќа, вашиот лекар може да ви направи тест со кој ќе се утврди дали ја имате болеста. А, откако ќе се открие, кламидијата се лекува со антибиотици.

Спирова С. | Црнобело