Знаци кои покажуваат дека сте пред „празничен“ нервен слом

Новогодишните прослави поминаа, но допрва нè чекаат јануарските празници. А, ова значи дека грижите за подароци, декорации, ручеци и облека сè уште траат.

Факт е дека повеќето луѓе се изложени на огромен стрес овој период, дури и повеќе од што можат да поднесат. Затоа не е ни чудно што многумина доживуваат „празничен“ нервен слом.

Па, доколку се препознаете во некој од следниве знаци, направете пауза за да го зачувате вашето здравје:

Имате преголеми очекувања

Ако имате чувство дека не сте ги оствариле целите и очекувањата од минатата година, нормално е да се зголеми нивото на стрес.

Неретко очекувањата на луѓето се толку нереални, што нема како да се исполнат.

Наместо да се грижите за работите што не сте ги завршиле до крајот на годината, обидете се да се фокусирате на она што сакате дa го правите сега.

Пред вас е нов почеток, поставете реалистични цели и ќе се ослободите од разочарувањето.

Си давате премногу обврски

Помеѓу работните и домашните обврски, работните и семејните прослави, лесно можете дa се „изгубите“.

Веројатно, периодов вашата листа со обврски нема крај, па немате време ни за јадење, ни за спиење.

Како со целите, бидете реалистични и со обврските што можете да ги завршите. Одредете ги приоритетите, одвојте време и за одмор и многу полесно ќе ја преживеете сезоната.

Истовремено, не плашете се да побарате помош од семејството и пријателите.

Односите со семејството се напнати

Ако имате проблематични родители, браќа или сестри, нормално е овој период односите да бидат понапнати.

Проблемот е што целата ситуација може да ескалира, па да си го уништите целиот празничен период.

Обидете се да не очекувате премногу од семејството и роднините. Кога ќе сфатите дека целата ситуација ви е премногу, најдобро е да се тргнете настрана да одморите неколку минути.

Паричникот ви е празен

Ако сте во лоша финансиска состојба, тогаш, во празнична сезона ова ќе ви создава дополнителен притисок.

Важно е да знаете дека не сте должни да трошите цело богатство за другите. Ако не сте во можност, подобро прескокнете ги подароците оваа година или подарете нешто што ќе го направите сами.

Очекувањата на другите не се ваш проблем и не треба уште толку да „заглавите“ поради нив.

Се справувате со депресија или друг здравствен проблем

Се очекува луѓето да бидат среќни овој период, но тоа може да претставува вистински проблем за оние кои страдаат од депресија или друг здравствен проблем.

Бидете искрени и отворени кога станува збор за вашите емоции. Разговарајте со семејството и пријателите и најдете начин како да ја направите празничната сезона поднослива за вас.

Ако се чувствувате лошо, нема потреба да присуствувате на сите собири и средби. Вашето физичко и ментално здравје нека ви биде приоритет.

Спирова С. | Црнобело