Зошто се зголемува желбата за храна за време на ПМС и како да се справите со ова?

Хормоналните промени што ги предизвикува менструалниот циклус влијаат врз многу нешта – од вашето расположение, па сè до апетитот и желбата за храна.

Досега сигурно сте забележале дека во периодот пред да добиете менструација, имате зголемен апетит и поголема желба за слатка и нездрава храна. А, веројатно и се прашувате која е причината за ова.

Многу истражувања покажале дека предменструалниот синдром (ПМС) е „виновникот“ за ова. Во просек, симптомите на ПМС се поајвуваат од 5 до 11 денови пред менструација, а овој период нивото на серотонин, прогестерон и другите хормони во телото се менува. Ова може да влијае врз вашиот апетит.

Според едно истражување, кај жените со ПМС е забележана намалена чувствителност на инсулин. Кај некои од нив, оваа промена може да предизвика разни ПМС симптоми, особено зголемена желба за храна.

Кај повеќето жени со ПМС се намалува нивото на серотонин во организмот. Некои истражувања покажале дека серотонинот има влијание врз апетитот, па ако се намали нивото на овој хормон во организмот, голема е веројатноста да имате зголемен апетит.

Пред почетокот на менструацијата, во телото се зголемува нивото на прогестерон – хормон што го лачат јајниците за да го подготват телото аз потенцијална бременост. Истовремено, овој хормон го стимулира апетитот, а ова е уште една причина зошто жените со ПМС сакаат да јадат повеќе.

Кај некои жени со ПМС се појавува и дефицит на магнезиум во организмот. Недостатокот од одредени хранливи материи, како во овој случај магнезиумот, може да ја зголеми желбата за одредена храна. Кога станува збор за магнезиумот, некои истражувања покажале дека неговото намалено ниво пред менструацијата можеби е една од главните причини и за другите непријатни ПМС симптоми.

Како да го избегнете прејадувањето за време на ПМС?

Според многуте истражувања, повеќе од очигледно е дека на жените навистина им се зголемува апетитот за време на ПМС и нема зошто да бидете загрижени за тоа. Сепак, иако не можете да ја контролирате желбата за храна, можете да контролирате што и колку ќе јадете, но и да преземете други мерки што ќе го ублажат овој симптом:

1. Бидете физички поактивни и одвојувајте време за активности што го намалуваат стресот, како јога или медитација. На овој начин ќе го зголемите нивото на „среќните“ хормони и генерално ќе се чувствувате подобро.

2. Кога ќе се појави желба за нездрава храна или јаглехидрати, внимателно избирајте што ќе јадете. На пример, наместо бел леб, јадете интегрален. Или, ако ви се јаде помфрит, подобро направете го во рерна.

3. Бидејќи (веројатно) за време на ПМС постојано ви се грицка нешто, опремете се со поздрави грицки, како јаткасти плодови. Добро би било да внесувате и повеќе овошје, кое колку-толку ќе ви ја задоволи желбата за благо.

4. Ако сепак не можете да му одолеете на чоколадото и знаете дека ќе изедете многу, подобро купете темно чоколадо, кое има помалку шеќери од млечното.

Спирова С. | Црнобело