Што претставува мигрената и зошто е почеста кај жените?

Мигрената е многу повеќе од обична главоболка – таа е невролошка состојба која може да предизвика низа симптоми, од кои најпознати, но и најчести се многу силните, интензивни главоболки. Мигрената може да се карактеризира и со симптоми како гадење и чувствителност на звук и светлина.

Во детството, мигрената е почеста појава кај момчињата отколку кај женските, но после пубертетот, мигрената е многу позастапена кај женските.

Всушност, мигрената се јавува трипати почесто кај возрасните жени, за разлика од возрасните мажи.

Мигрената е почеста кај жените поради хормоните

Жените не само што почесто се соочуваат со мигрена, туку и ја искусуваат поразлично од мажите. Кај нив епизодите на болка се јавуваат почесто и траат подолго, а и хроничната болка е почеста кај нив.

Главниот виновник за ова најчесто е хормонот естроген и најсилните „напади“ на мигрена кај жените се случуваат кога се менува неговото ниво во организмот.

Мигрената може да биде предизвикана и од други нешта, но таканаречената хормонална мигрена доминира кај жените. Како што напоменавме, оваа мигрена настанува поради женските хормони, особено естрогенот, и може да биде најизразена за време на менструација, овулација, бременост, перименопауза или во првите денови откако ќе почнете или престанете да земате лекови кои содржат естроген.

Други причини за појава на мигрена

Иако експертите уште не знаат сè за ова заболување, јасно е дека генетиката, како и опкружувањето можат да имаат улога во појавата на мигрена. Исто така, причина може да биде и хормонална нерамнотежа од други хормони, како серотонин.

Ако една личност има мигрена, постојат неколку фактори што можат да ги „активираат“ симптомите. Веќе кажавме дека кај жените, активирањето најчесто настанува поради хормонални промени. Покрај тоа, стресот, пијалаците со алкохол и кофеин, промените на времето, одредени лекови и недостатокот од сонот исто така можат да ги активираат симптомите.

Покрај жените постојат и други групи луѓе изложени на поголем ризик од мигрена. Оние кои имаат членови од семејството со мигрена, можно е и самите да се соочат со нарушувањето. Влијание може да има и возраста. Односно, првите симптоми на мигрена најчесто се појавуваат во адолесценцијата.

Кои се најчестите симптоми и дали има лек зa мигрена?

Покрај главоболката, мигрената ја придружуваат и други симптоми. Во зависност од видот на мигрената, личноста може да чувствува замор и недостаток од енергија, хиперактивност, раздразливост, вкочанетост во вратот, проблеми со зборувањето, чувство на трнење во лицето, рацете и нозете, сувост во устата и повремени проблеми со видот.

Кога мигрената е најинтензивна, личноста може да чувствува зголемена чувствителност на светло и звук, гадење, вртоглавица, интензивна и/или пулсирачка болка во главата и повраќање.

После епизодата, некои луѓето чувствуваат и промени во расположението – од еуфорија, до апатија.

За жал, уште нема лек за мигрена, но лекарот може да ви помогне да се справите со симптомите и да ја намалите нивната појава. Исто така, лекарот може да ви помогне да го намалите интензитетот на симптомите.

Терапијата што ја одредува лекарот зависи од неколку фактори, како возраст, интензитет на симптоми, земање други лекови и слично.

Обично контролирањето на мигрената е комбинација од неколку третмани, вклучувајќи терапија со лекови, промени во животните навики и хормонална терапија.

Спирова С. | Црнобело