Што е телесна дисморфија и кои познати личности страдаат од оваа состојба?

Што е телесна дисморфија - кога се јавува, кои се симптомите и која е разликата помеѓу оваа ментална состојба и „обичната“ опседнатост со сопствениот изглед? Кои познати личности страдаат од оваа состојба?

Меган Фокс (35) важи за секс-симбол на денешницата, но таа во интервју за британскиот GQ Style призна дека страда од телесна дисморфија и дека не е сигурна за сопствениот изглед.

„Можеби гледаме во некои личности и си мислиме: ‘Таа е мошне убава. Нивниот живот сигурно е лесен’. Неверојатно, но тие луѓе некогаш го немаат истото мислење за себеси“ – вели Меган.

Што е телесна дисморфија?

Станува збор за ментална состојба што се јавува под три различни називи: телесна дисморфија, дисморфичен синдром или дисморфофобија. Луѓето што страдаат од оваа состојба опсесивно се преокупирани со мислите дека со нивниот изглед нешто сериозно не е во ред и најчесто ги преземаат сите можни мерки за да го прикријат или да го поправат тој недостаток.

Со други зборови, на овие луѓе, огледалото не им е пријател, па најчесто се опседнуваат со сопствените маани и несовршености (големината на носот, големината на стапалата, изгледот на веѓите, обликот на устата... ).

Телесната дисморфија или дисморфофобија била откриена уште во 1886-тата кога италијанскиот лекар Енрико Морисели за првпат известил за нарушување од овој вид и го сковал неговото име.

Состојбата спаѓа во опсесивно-компулсивниот спектар на пореметувања и подеднакво ги погодува и мажите и жените. Првите симптоми најчесто се јавуваат во периодот на адолесценцијата, а за мажите е карактеристично тоа што се опседнуваат со т.н. мускулна дисморфофобија, односно, главно се сконцентрирани на нивното „неразвиено“ тело.

Овие луѓе постојано го проверуваат сопствениот „недостаток“, се споредуваат со другите луѓе и бараат начин за да го сокријат таквиот „недостаток“, па често може да се случи и да бараат постојана потврда од блиските дека навистина немаат таков недостаток.

Речиси сите ние сме имале некој период во животот кога не сме биле задоволни со некој аспект од нашиот изглед, но кај луѓето што страдаат од ваква состојба таквите незадоволства се трајни и влијаат на нивното секојдневно функционирање.

Без разлика на тоа колку и да ги уверувате ваквите луѓе дека се убави и дека ништо не им недостасува, тие сепак ќе останат убедени дека се неприфатливо грди и дефектни.

На следната страна погледнете кои познати личности страдаат од оваа состојба...