Зошто не треба да спиете со контактни леќи (и што да правите ако случајно ги заборавите)?

Ако спиете со леќи, драстично си го зголемувате ризикот од инфекции на очите кои можат да предизвикаат голема штета.

Контактните леќи се одлично решение за луѓето кои имаат проблеми со видот, но не сакаат да носат очила.

Но, за разлика од очилата, леќите бараат посебна нега и морате да обрнете внимание на некои работи за да ги избегнете инфекциите со очите.

Сите што носат леќи многу добро знаат дека не треба да спијат со нив.

Но, зошто важи оваа забрана и што се случува со очите ако заспиете со леќи?

Зошто не треба да спиете со леќи?

Според Центарот за контрола и превенција на болести од САД, спиењето со контактни леќи го зголемува ризикот од инфекција за шест до осум пати.

Сериозните инфекции на очите можат да предизвикаат оштетување на рожницата, а во ретки случаи и губење на видот.

Рожницата е надворешната, проѕирна обвивка што го штити окото од инфекции. А, за да го заштити окото, на рожницата ѝ се потребни хидратација и кислород.

Додека сте будни, трепкањето ја одржува влажноста на очите, а и дотокот на кислород е добар.

Контактните леќи покриваат дел од рожницата, па со тоа ја намалуваат влажноста на окото. Додека сте будни, ова намалување е занемарливо и не предизвикува проблеми.

Но, кога спиете со леќи и очите ви се постојано затворени, окото не добива доволно влажност и кислород. Ова, пак, ја намалува способноста на клетките во рожницата да се борат против бактериите.

Што значи, ако спиете со леќи, си го зголемувате ризикот од секакви инфекции.

Што ако случајно засипете со леќи?

Веројатно на повеќето луѓе кои носат леќи им се случило да ги заборават и да заспијат со нив.

Во овој случај важно е да ги извадите леќите веднаш откако ќе станете.

Ако не можете да ги извадите лесно, како вообичаено, немојте да користите сила бидејќи ќе го оштетите окото.

Наместо тоа ставете капки за очи, како вештачки солзи. Капките ќе ја зголемат влажноста на окото и ќе го олеснат вадењето на леќите.

Ако ни тогаш не можете да ги извадите лесно, веднаш одете на лекар.

Ако дома самите успеете да ги извадите леќите, препорачливо е да не ги носите барем еден ден.

Притоа следете ја состојбата на очите и ако забележите знак на инфекција, веднаш одете на лекар.

Треба да обрнете внимание на симптоми како замаглен вид, исцедок од окото, црвенило и солзење на очите.

Неколку совети за безбедно носење контактни леќи

Вашиот лекар сигурно ви кажал сè што треба да знаете за носењето леќи, но секогаш е добро да се потсетите.

1. Немојте да пливате или да седите во полна када со леќи.

2. Мијте ги рацете со сапун и вода пред да ги ставате или вадите леќите.

3. Плакнете ги леќите и чувајте ги во растворот специјално наменет за нив. Немојте никако да ги миете со обична вода бидејќи ова нема да ги дезинфицира.

4. Секој ден заменувајте го растворот од садот во којшто ги чувате леќите.

5. Често менувајте ги леќите и садот во којшто ги чувате.

6. Немојте да ги чувате леќите во сад со какви било оштетувања.

7. Ако одите на патување, немојте да ставате од растворот за леќите во какво било шишенце кое можеби било изложено на бактерии и микроогранизми. Наместо тоа, понесете го оригиналното шише или купете помала амбалажа.

Спирова С. | Црнобело