Кардиолог открива која храна ја јаде поретко за да го зачува здравјето на срцето

Според кардиологот Хармони Рејнолдс, нема потреба да се откажете од храната како сланина или чипс за да го зачувате здравјето на срцето. Наместо тоа, бидете умерени и кога сте во можност најдете поздрава алтернатива.

Невозможно е постојано да се храниме здраво, а и не ни е од никаква корист ако пробаме целосно да си забраниме некоја нездрава храна што ја сакаме.

Многу подобро е да научиме да бидеме умерени и, едноставно, да не претеруваме со овие намирници.

Хармони Рејнолдс е кардиолог од САД и за Insider открива кои намирници ги јаде поретко и умерено за да го зачува здравјето на срцето.

Taa истакнува дека можете да уживате и во овие намирници, но пробајте да ги консумирате поретко и давајте ѝ предност на поздравата храна.

Кои намирници ги избегнува Хармони?

Маргарин и кокосово масло

Хармони вели дека ретко консумира маргарин, бидејќи некои истражувања покажуваат дека овие намирници можат да имаат лошо влијание врз здравјето на срцето.

Кокосовото масло, исто така, содржи заситени масти, па и тоа спаѓа во категоријата намирници со кои треба да бидеме умерени, а добра алтернатива за маслата е маслиновото. 

Чипс

Речиси и да нема личност која не сака чипс, а и самата Хармони ужива во овие грицки.

Сепак, вели дека избегнува да купува бидејќи ни таа не може да се контролира и да не изеде многу.

„Добро се познавам себеси и знам дека нема шанси да изедам малку чипс и да го тргнам другиот настрана“.

И во овој случај важно е да бидете умерени – слободно јадете чипс, но немојте да го изедете целото пакување.

Хармони вели дека кога сакате поздрави грицки, пуканките се добар избор.

Сланина

Веќе сите знаеме дека сланината има многу масти и треба да ја јадеме поретко.

Хармони вели дека го сака вкусот на сланината, но пробува да ја јаде само во посебни прилики.

„Луѓето не можат да следат совршена диета. Важно е да знаете дека некогаш треба да се почастите и не си правите услуга ако целосно си забраните некоја храна.

Сметам дека е подобро да бидете умерени и, кога можете, заменете ја мрсната храна со поздрава алтернатива“.

Темно чоколадо наместо други десерти

Сите сакаме колачиња, торти и крофни, но и знаеме дека овие десерти се полни со шеќер и нездрави масти – состојки кои можат да го влошат здравјето на срцето.

Како и за сè останато на листава, Хармони советува да бидете умерени.

Ако сметате дека сте претерале со слатки, но уште ви се јаде нешто благо, Хармони вели дека темното чоколадо е добар избор.

И секако, не треба целосно да се откажете ни од слатките задоволства:

„Кога сум на забава и сакам да пробам нешто што знам дека не е многу здраво, пробувам еден залак. Ако навистина ми се допаѓа, си дозволувам да уживам во поголема количина. Ако вкусот не ми е нешто посебно, пробувам да не јадам повеќе“.

Спирова С. | Црнобело